ဂျာမနီလူမျိုးနည်းပြ တူချယ်လက်ထက်မှာ အင်္ဂလန်အသင်း တိုးတက်မှုတွေရှိလာတယ်လို့ အသင်းခေါင်းဆောင် ဟယ်ရီကိန်းက ပြောသွားခဲ့ပါတယ်။
အင်္ဂလန်အသင်းဟာ နည်းပြတူချယ်လက်ထက် ၂ ပွဲကစားထားရာမှာ ၂ ပွဲ စလုံး အနိုင်ရထားသလို ပေးဂိုးလည်း တစ်ဂိုးမှ မရှိခဲ့ပါဘူး။ ပြီးခဲ့တဲ့သောကြာညက အယ်ဘေးနီးယား အသင်းကို ၂ ဂိုးပြတ်နဲ့ အနိုင်ရခဲ့တဲ့ အင်္ဂလန်အသင်းဟာ တနင်္လာညက ကစားခဲ့တဲ့ ပွဲမှာလည်း လတ်ဗီးယား အသင်းကို ၃ ဂိုး ပြတ်နဲ့ ထပ်မံအနိုင်ရခဲ့ပါတယ်။ခံစစ်ကို ပိတ်ကစားတဲ့ ပြိုင်ဘက်အသင်းနဲ့ ဆုံတွေ့ရင် ကစားရ ပိုခက်တတ်ပြီး ဂိုးရဖို့က ခက်ခဲတတ်ပေမယ့် အနိုင်ဂိုးတွေရအောင် ကစားနိင်ခဲ့တဲ့ ကစားသမားတွေရဲ့ စိတ်ဆန္ဒပြင်းပြမှုကို ကြည့်ရင် အင်္ဂလန်အသင်း တိုးတက်လာတာကို တွေ့မြင်နိုင်ပါတယ်လို့ လတ်ဗီးယားနဲ့ ပွဲအပြီးမှာ ဟယ်ရီကိန်းက ပြောသွားခဲ့ပါတယ်။
ဟယ်ရီကိန်းကိုယ်တိုင်ကလည်း တူချယ်လက်ထက် ၂ ပွဲမှာ ၂ ပွဲစလုံး ဂိုးတွေရခဲ့ပြီး အင်္ဂလန် လက်ရွေးစင်အသင်းနဲ့အတူ ဝင်ဘလေကွင်းမှာကစားခဲ့တဲ့ နောက်ဆုံး ၁၇ ပွဲမှာ ၁၇ ဂိုး သွင်းယူထားနိုင်ခဲ့ပါတယ်။ နည်းပြတူချယ်ကလည်း အင်္ဂလန်အသင်းသားတွေရဲ့ အနိုင်ရလိုစိတ် ပြင်းပြမှုနဲ့ ကြိုးစားအားထုတ်မှုတွေအပေါ် အားရကျေနပ်မိပေမယ့် အသင်းရဲ့တချို့သောနေရာတွေမှာ တိုးတက်ဖို့ လိုအပ်နေသေးတယ်လို့ လတ်ဗီးယား အသင်းကို နိုင်တဲ့ပွဲအပြီးမှာ ပြောသွားခဲ့ပါတယ်။
