ရီးရဲလ်အသင်းဟာ စာချုပ်သစ်ချုပ်ဆိုဖို့အတွက် ဘရာဇီးတိုက်စစ်မှူး ဗီနီစီးယက်စ်ရဲ့ အေးဂျင့်ဆီကို ဆက်သွယ်ထားတယ်လို့ သိရပါတယ်။ဗီနီစီးယက်စ်ရဲ့ လက်ရှိစာချုပ်က ၂၀၂၇ ဇွန်လအထိရှိသေးပေမဲ့ ဆော်ဒီပရိုလိဂ်ကလပ်အသင်းတွေရဲ့ စိတ်ဝင်စားခြင်းကို ခံနေရတာကြောင့် အခုလိုမျိုး စာချုပ်သစ်ချုပ်ဖို့ကို ရီးရဲလ်အသင်းဘက်က ပြင်ဆင်လာခဲ့တာဖြစ်ပါတယ်။
ဗီနီစီးယက်စ်ရဲ့ အေးဂျင့်ဆီကို စာချုပ်သစ်ဆွေးနွေးဖို့အတွက် ရီးရဲလ်အသင်းဘက်က ကမ်းလှမ်းမှုပြုလုပ်ထားပြီး လာမယ့်တစ်ပတ်ထဲမှာပဲ ဆွေးနွေးမှုတွေစတင်ဖွယ်ရှိနေပါတယ်။ ရီးရဲလ်အသင်းနဲ့ နီးစပ်တဲ့ ရင်းမြစ်တွေ အရတော့ စာချုပ်သစ်ထဲမှာ ဗီနီစီးယက်စ်ရဲ့ လုပ်ခလစာကို တိုးမြှင့်ပေးထားတယ်လို့ သိရပါတယ်။ အသက် ၂၄ နှစ်အရွယ် ဗီနီစီးယက်စ်က ရီးရဲလ်အသင်းမှာ ကာလရှည်ဆက်နေသွားဖို့မျှော်လင့်ထားတယ် လို့ ပြီးခဲ့တဲ့လက ပြောကြားထားခဲ့ဖူးတာကြောင့် စာချုပ်သစ်ဆွေးနွေးမှုကအဆင်ပြေပြေနဲ့ ပြီးဆုံးသွားလိမ့်မယ်လို့ ရီးရဲလ်အသင်းဘက်က ယုံကြည်နေပါတယ်။
ပြီးခဲ့တဲ့နွေရာသီ အပြောင်းအရွှေ့မှာ ဆော်ဒီပရိုလိဂ်အသင်း ၄ သင်းကို ပိုင်ဆိုင်ထားတဲ့ Saudi Arabia’s Public Investment Fund (PIF)ဘက်က တာဝန်ရှိသူတွေဟာ ဗီနီးစီးယက်စ်ရဲ့ အေးဂျင့်ဆီကို ချဉ်းကပ်ခဲ့ပြီး လာမယ့်နွေရာသီမှာ တရားဝင်ကမ်းလှမ်းမှုတွေပြုလုပ်လာဖွယ်ရှိနေတယ်လို့ သတင်းတွေထွက်လာခဲ့ပြီးနောက် ရီးရဲလ် အသင်းဟာ သူတို့ရဲ့တိုက်စစ်မှူးကို စာချုပ်သစ်ချုပ်ဖို့ စီစဉ်လာခဲ့ကြတာဖြစ်ပါတယ်။
