ဝုဗ်အသင်းကို အနိုင်ရတဲ့ပွဲက လီဗာပူးကစားသမားတွေရဲ့ အာရုံစူးစိုက်နိုင်မှုနဲ့ ပတ်သက်လို့ နည်းပြ စလော့က ချီးကျူးလိုက်ပါတယ်။လီဗာပူးအသင်းက ဝုဗ်အသင်းကို ၂ ဂိုး- ၁ဂိုးနဲ့ အနိုင်ရခဲ့တာဖြစ်ပြီး ပွဲချိန် ပထမပိုင်းမှာပဲ လီဗာပူးအသင်း ၂ ဂိုးအသာနဲ့ ဦးဆောင်နိုင်ခဲ့တာပါ။
လီဗာပူးအသင်းဟာ ပြီးခဲ့တဲ့ကြားရက်မှာ ကစားခဲ့တဲ့ အဲဗာတန်အသင်းနဲ့ မာဆေးဆိုက်ဒ်ဒါဘီပွဲမှာ အဲဗာတန်အသင်းရဲ့ ပွဲပြီးကာနီးချေပဂိုးကြောင့် သရေကျခဲ့ပြီး စိတ်ပျက်စရာရလဒ်နဲ့ ရင်ဆိုင်ခဲ့ရပါတယ်။ အခုဝုဗ်အသင်းနဲ့ပွဲမှာတော့ လီဗာပူးအသင်းသားတွေဟာ စိတ်ပျက်စရာ ရလဒ်ကနေ ပြန်လည်ရုန်းထလာနိုင်ပြီး အသင်းရဲ့ ချန်ပီယံမျှော်လင့်ချက်ကို ပိုမိုခိုင်မာအောင် လုပ်ဆောင်ပြသွား ခဲ့တယ်လို့ နည်းပြစလော့က ချီးကျူးသွားခဲ့တာပါ။
လီဗာပူးအသင်းဟာ နောက်ဆုံး ကစားခဲ့တဲ့ ပြိုင်ပွဲစုံ ၂ ပွဲဆက် နိုင်ပွဲပျောက်ခဲ့ပြီး ဝုဗ်အသင်းနဲ့ပွဲမှာ နိုင်ပွဲပြန်ရှာတွေ့ခဲ့တာဖြစ်ပါတယ်။ ဝုဗ်အသင်းနဲ့ပွဲမှာ နိုင်ပွဲပြန်ရခဲ့တာက အသင်းအတွက်အများကြီးပိုကောင်းစေပါတယ်လို့လည်း စလော့က ပြောသွားခဲ့ပါတယ်။ လီဗာပူးအသင်းဟာ ဝုဗ်အသင်းကို အနိုင်ရခဲ့တဲ့အတွက် ပရီးမီးယားလိဂ် အမှတ်ပေးဇယားထိပ်မှာ ၂၅ ပွဲကစားအပြီး ရမှတ် ၆၀ နဲ့ ဆက်လက်ရပ်တည်သွားခဲ့ပြီး ဒုတိယနေရာက အာဆင်နယ်အသင်းကို ၇ မှတ်အထိဖြတ်ထားနိုင်ခဲ့တာဖြစ် ပါတယ်။ လီဗာပူးအသင်းဟာ လာမယ့် ဖေဖော်ဝါရီလ ၂၀ ရက်နေ့မှာတော့ ပရီးမီးယားလိဂ်ပွဲစဉ် ၂၉ကို ကြိုကန်ပွဲ အဖြစ် ဗီလာအသင်းအိမ်ကွင်းကို သွားရောက်ကစားရမှာဖြစ်ပါတယ်။
