ဩစတြေးလျ စက်ဘီးစီးကစားသမား အီဝမ်ဟာ ဗြိတိန်စက်ဘီးအသင်းတစ်သင်းဖြစ်တဲ့ အင်နီယို့စ်အသင်းနဲ့ ၁ နှစ် သက်တမ်းရှိတဲ့ စာချုပ်ကို ချုပ်ဆိုလိုက်ပါတယ်။ အသက် ၃၀ အရွယ် အီဝမ်ဟာ စက်ဘီးပြိုင်ပွဲကြီးတွေဖြစ်တဲ့ တိုးဒီဖရန့်၊ ဂီရိုဒီအီတာလီယာနဲ့ စပိန်တိုးပြိုင်ပွဲတွေမှာ အဆင့်တစ်ခုကို အနိုင်ရခဲ့ဖူးသလို မီလန်-ဆန်ရီမို ပြိုင်ပွဲ မှာလည်း ဆုပေးပွဲစင်မြင့်ကို ၂ ကြိမ်တက်ရောက်ခွင့်ရထားခဲ့ဖူးတာဖြစ်ပါတယ်။
ပြီးခဲ့တဲ့ ၂၀၂၄ ရာသီမှာ ဩစတြေးလျစက်ဘီးအသင်းဖြစ်တဲ့ ဂျေကိုအသင်းနဲ့ ပြိုင်ပွဲဝင်ခဲ့တဲ့ အီဝမ်ဟာ စက်ဘီးပြိုင်ပွဲ ၄ ခု အနိုင်ရခဲ့ပြီး နှစ်ကုန်မှာ အသင်းနဲ့လမ်းခွဲခဲ့တာဖြစ်ပါတယ်။ အခုနှစ်မှာတော့ အင်နီယို့စ်အသင်းဆီကို ရောက်လာခဲ့တာဖြစ်ပြီး အင်နီယို့စ်အသင်းကို ပြောင်းရွှေ့ လာမှုက သူ့ရဲ့ကစားသမားဘဝ အကောင်းဆုံးပုံစံကိုပြန်ရဖို့အတွက် အကူအညီ ဖြစ်စေလိမ့်မယ်လို့ အီဝမ်က ယုံကြည်နေပါတယ်။ ၂၀၂၅ အတွင်းသူ့ရဲ့ရည်မှန်းချက်က ပြိုင်ပွဲကြီးတွေမှာ အနိုင်ရဖို့ဖြစ်တယ်လို့လည်း အီဝမ်က ပြောသွားခဲ့ပါတယ်။
၂၀၁၄ မှာပရော်ဖက်ရှင်နယ် စက်ဘီးကစားသမား ဘဝကို စတင်ခဲ့တဲ့ အီဝမ်ဟာ ပရိုကစားသမားဘဝ နိုင်ပွဲပေါင်း ၆၃ ပွဲအထိရရှိထားခဲ့တာဖြစ်ပါတယ်။ အင်နီယို့စ်အသင်းရဲ့ အမှုဆောင်အရာရှိ ဂျွန်အလက်ကလည်း အီဝမ်ဟာ ပြိုင်ပွဲဝင်ကောင်းတစ်ဦး ဖြစ်တယ်ဆိုတာ သက်သေပြထားပြီးသားဖြစ်လို့ အသင်းအတွက် အရေးပါတဲ့ အားဖြည့်မှုဖြစ်လာလိမ့်မယ်လို့ ပြောပါတယ်။
