၂၀၂၅ ခုနှစ် ထိုင်းနိုင်ငံမှာ ကျင်းပမယ့် အရှေ့တောင်အာရှ အားကစားပြိုင်ပွဲ(ဆီးဂိမ်း)မှာ မြန်မာအမျိုးသား ဘတ်စကက်ဘောအသင်း ဝင်ရောက်ယှဉ်ပြိုင်နိုင်ရေး ကြိုတင်ပြင်ဆင်တာတွေ စတင်ဆောင်ရွက်နေပြီ ဖြစ်တယ် လို့ မြန်မာနိုင်ငံဘတ်စကက်ဘောအဖွဲ့ချုပ်အတွင်းရေးမှူး ဦးကျော်ကျော်ဝင်းက One News ကို ပြောပါတယ်။
မြန်မာအမျိုးသား ဘတ်စကက်ဘောအသင်းအနေနဲ့ ကြိုတင်ပြင်ဆင်မှုအဖြစ် ပဏာမကစားသမား အယောက် ၃၀ ကျော်ကို ရွေးချယ်ပြီး ကြံ့ခိုင်မှုအပိုင်း ကြိုတင်ပြင်ဆင်လေ့ကျင့်တာတွေ စတင်ဆောင်ရွက်နေတာလို့ ဆိုပါတယ်။ဆီးဂိမ်းပြိုင်ပွဲမှာ အောင်မြင်မှုတွေရရှိရေးအပြင် မြန်မာနိုင်ငံမှာ ဘတ်စကက်ဘောကစားနည်း ဖွံ့ဖြိုးတိုးတက်လာ စေဖို့ ရည်ရွယ်ချက်နဲ့ ဆောင်ရွက်နေတာဖြစ်တယ်လို့ ဦးကျော်ကျော်ဝင်းက ပြောပါတယ်။
မြန်မာအမျိုးသား ဘတ်စကက်ဘောအသင်းအတွက် ရွေးချယ်မယ့်ကစားသမားတွေရဲ့ အရည်အချင်းကို စိစစ်နိုင် ဖို့ လာမယ့် မေလနဲ့ စက်တင်ဘာလအတွင်း ရန်ကုန်နဲ့ နေပြည်တော်မှာ လက်ရည်စမ်းပွဲတွေကို ကျင်းပနိုင်ဖို့ စီစဉ်ထားတယ်လို့ ဆိုပါတယ်။ ဒါ့အပြင် မြန်မာအမျိုးသား ဘတ်စကက်ဘောလက်ရွေးစင်ဟောင်းကြီးတွေ အတွက်လည်း လူမှုရေးအရ ကူညီပံ့ပိုး ဆောင်ရွက်မှုတွေ ပြုလုပ်သွားဖို့ ရှိတယ်လို့လည်း ဦးကျော်ကျော်ဝင်းက ပြောပါတယ်။(၃၃)ကြိမ်မြောက် ဆီးဂိမ်းပြိုင်ပွဲကို ၂၀၂၅ ခုနှစ် ဒီဇင်ဘာလ(၉)ရက်ကနေ(၂၀)ရက်အထိ ထိုင်းနိုင်ငံ၊ ဘန်ကောက်၊ ချောင်ဘူရီ ဆောင်ခလာ မြို့သုံးမြို့မှာ အားကစားနည်း (၅၀)နဲ့ ကျင်းပသွားမှာ ဖြစ်ပါတယ်။
