အမေရိကန် ဘတ်စကက်ဘော အကျော်အမော် ကိုဘီဘရိုင်ယန် ဝတ်ဆင်ခဲ့တဲ့ အင်္ကျီကို လေလံပွဲမှာ ဒေါ်လာ ၇ သန်းနဲ့ ရောင်းချခဲ့ရတယ်လို့ သိရပါတယ်။ အဲဒီအင်္ကျီကို LA လိတ်ကာအသင်းနဲ့အတူ ပထမဆုံးပွဲထွက်ခဲ့တဲ့ ရာသီကြိုပွဲမှာ ကိုဘီဘရိုင်ယန် ဝတ်ဆင်ထားခဲ့တာ ဖြစ်ပါတယ်။
ကိုဘီဘရိုင်ယန်ဟာ အသက် ၁၈ နှစ်အရွယ် ၁၉၉၆ မှာ NBA ကစားသမားဘဝ ပထမဆုံးရာသီကို စတင်ယှဉ်ပြိုင်ခဲ့တာဖြစ်ပြီး အခုရောင်းချခဲ့ရတဲ့ အင်္ကျီကို ၁၉၉၆ အောက်တိုဘာ ၁၆ ရက်မှာ ကစားခဲ့တဲ့ ရာသီကြိုပွဲစဉ်အပါအဝင် ပွဲစဉ် ၇ ပွဲခန့်မှာ ဝတ်ဆင်ထားခဲ့တာ ဖြစ်တယ်လို့ သိရပါတယ်။ အခုအင်္ကျီရောင်းချရမှုဟာ ဆိုသယ်ဘီ(Sotheby)ရဲ့ အားကစားအင်္ကျီလေလံတင် ရောင်းချရမှုမှာ ဒေါ်လာ ၉ ဒသမ ၃ သန်းနဲ့ ရောင်းချခဲ့ရတဲ့ ၁၉၈၆ ကမ္ဘာ့ဖလားမှာ မာရာဒိုနာဝတ်ဆင်ခဲ့တဲ့အင်္ကျီ ပြီးတဲ့နောက် စတုတ္ထ ဈေးအကြီးဆုံး ရောင်းချရမှုလည်း ဖြစ်ခဲ့ပါတယ်။
ပွဲဦးထွက် ပွဲစဉ်ဆိုတာ ကစားသမား တစ်ယောက်ရဲ့ဘဝမှာ အရေးအပါဆုံး ပွဲတွေဖြစ်သလို ကိုဘီဘရိုင်ယန် ပွဲဦးထွက်ဝတ်ဆင်ခဲ့တဲ့ အင်္ကျီကလည်း တန်ဖိုးထားရမယ့် အရာတစ်ခုဖြစ်ပါတယ်လို့ ဆိုသယ်ဘီရဲ့ တာဝန်ရှိသူတစ်ဦးက ပြောပါတယ်။ NBA ချန်ပီယံဆု ကို ၅ ကြိမ်ရရှိခဲ့ဖူးတဲ့ ဘရိုင်ယန်ဟာ အသက် ၄၁ နှစ်အရွယ် ၂၀၂၀ ဇန်နဝါရီလမှာ ဖြစ်ပွားခဲ့တဲ့ ရဟတ်ယဉ် ပျက်ကျမှုအတွင်း ကွယ်လွန်သွားခဲ့တာဖြစ်ပါတယ်။
