ဒေါ့မွန်အသင်းနဲ့ပွဲစဉ်မှာ ဟတ်ထရစ်သွင်းယူကာ ခြေစွမ်းပြနိုင်ခဲ့တဲ့ ဘရာဇီးတောင်ပံကစားသမား ဗင်နီးစီးယက်စ် ကို ရီးရဲလ်မက်ဒရစ်နည်းပြ အန်ဆလော့တီက ပွဲအပြီးမှာ ချီးကျူးခဲ့ပါတယ်။
ရီးရဲလ်မက်ဒရစ်အသင်းဟာ ဒေါ့မွန် အသင်းနဲ့ပွဲစဉ်မှာ ပထမပိုင်းအပြီးမှာ (၂)ဂိုးပြတ် ရှုံးနိမ့်နေခဲ့ပေမယ့် ဗင်နီးစီးယက်စ်က ဒုတိယပိုင်းပွဲကစားချိန်မှာ ခြေစွမ်းပြနိုင်ခဲ့တာကြောင့် ပွဲအပြီးမှာ(၅)ဂိုး၊ (၂)ဂိုးနဲ့ ဂိုးပြတ်အနိုင်ရခဲ့တာပါ။
ဒေါ့မွန်အသင်းနဲ့ပွဲစဉ်မှာ ပြသခဲ့တဲ့ ဗင်နီးစီးယက်စ်ရဲ့ခြေစွမ်းက ဟတ်ထရစ် မသွင်းယူနိုင်ခဲ့ရင်တောင်မှ ချီးကျူးရမယ့် ခြေစွမ်းဖြစ်တယ်လို့ နည်းပြ အန်ဆလော့တီက ပြောပါတယ်။
ဗင်နီးစီးယက်စ်ဟာ ရီးရဲလ်မက်ဒရစ်အသင်းအတွက် ခြေစွမ်းကောင်းတွေကို ပုံမှန်ပြသနေခဲ့တာကြောင့် အခုနှစ်ရဲ့ရွှေဘောလုံးဆုကို ရယူဖို့အတွက် ထိုက်တန်မှုရှိတယ်လို့လည်း နည်းပြ အန်ဆလော့တီက ဆက်လက်ပြောကြားခဲ့ပါတယ်။
ရီးရဲလ်မက်ဒရစ်အသင်းဟာ အခုပွဲစဉ်မှာ အနိုင်ရတာကြောင့် ချန်ပီယံလိဂ်(၃)ပွဲ ကစားပြီးချိန်မှာ (၂)ပွဲနိုင်၊ (၁)ပွဲရှုံးနဲ့ ရမှတ်(၆)မှတ်ကို ရယူနိုင်ခဲ့ပြီဖြစ်ပါတယ်။
