အယ်နာဆာအသင်းရဲ့ ပေါ်တူဂီတိုက်စစ်မှူး ရော်နယ်ဒိုက လက်ရွေးစင်ကစားသမားဘဝကနေ အနားယူဖို့ အစီအစဉ် မရှိသေးဘူးလို့ ဩဂုတ်လ(၂)ရက်နေ့က ပြောကြားခဲ့ပါတယ်။
ရော်နယ်ဒိုဟာ အသက်(၃၉)နှစ်အရွယ် ရှိပြီဖြစ်ပေမယ့် ဆော်ဒီကလပ် အယ်နာဆာအသင်းမှာ အဓိကကစားသမားအဖြစ် ကစားနေသလို လက်ရွေးစင် ကစားသမားအဖြစ်ကနေလည်း အနားယူဖို့ ဆန္ဒမရှိသေးတာပါ။
လက်ရွေးစင်ဘဝကနေ အနားယူဖို့က ခက်ခဲတဲ့ ဆုံးဖြတ်ချက် မဟုတ်ပေမယ့် အခုအချိန်မှာတော့ အနားယူဖို့ အစီအစဉ်မရှိသေးဘူးလို့ ရော်နယ်ဒိုက ပြောပါတယ်။
လက်ရွေးစင်ကစားသမားဘဝမှာ အကောင်းဆုံးပေးဆပ်ခဲ့ပေမယ့် လူငယ်ကစားသမားတွေကို နေရာပေးဖို့အတွက် လိုအပ်တာကြောင့် အသင်းအတွက် ကစားပေးနိုင်စွမ်း မရှိတော့ဘူးလို့ ခံစားရပြီဆိုတာနဲ့ အနားယူဖို့ဆုံးဖြတ်သွားမယ်လို့ ရော်နယ်ဒိုက ဆက်လက်ပြောကြားခဲ့ပါသေးတယ်။
ရော်နယ်ဒိုဟာ ပေါ်တူဂီလက်ရွေးစင်ကစားသမားဘဝ မှာ အသင်းအတွက် ပြိုင်ပွဲစုံ(၂၁၂)ပွဲ ကစားပေးခဲ့ပြီး ဂိုးပေါင်း(၁၃၀)ကို သွင်းယူပေးနိုင်ခဲ့ပါတယ်။
