ဩဂုတ်လ(၂၅)ရက်ညက ကစားခဲ့တဲ့ ပရီးမီးယားလိဂ်ပွဲစဉ်မှာ လီဗာပူးအသင်းက ဘရန့်ဖို့ဒ်အသင်းကို အိမ်ကွင်းမှာ (၂)ဂိုးပြတ်နဲ့ အနိုင်ရခဲ့ပါတယ်။
လီဗာပူးအသင်းဟာ ဘရန့်ဖို့ဒ်အသင်းနဲ့ပွဲစဉ်မှာ အကောင်းဆုံး ဖိအားပေးကစားခဲ့ ပြီး နည်းပြအာနီစလော့လက်ထက် ဒုတိယမြောက် ပရီးမီးယားလိဂ်နိုင်ပွဲကို ဖန်တီးနိုင်ခဲ့တာပါ။
လီဗာပူးအသင်း အတွက် ဦးဆောင်ဂိုးကို ပွဲချိန်(၁၃)မိနစ်မှာ ဂျိုတာရဲ့ပေးပို့မှုကို ဒီယက်ဇ်က သွင်းယူခဲ့တာဖြစ်ပါတယ်။
ပွဲချိန်မိနစ် (၇၀)မှာ ဒီယက်ဇ်ရဲ့ပေးပို့မှုကိုပဲ ဆာလာက အခုရာသီသူ့ရဲ့ဒုတိယမြောက်ဂိုးကို သွင်းယူခဲ့တာပါ။
လီဗာပူးအသင်း ဟာ အခုပွဲစဉ်မှာ ပေးဂိုးမရှိခဲ့တာကြောင့်လည်း ပရီးမီးယားလိဂ်(၂)ပွဲကစားပြီးချိန်မှာ (၂)ပွဲလုံးကို ပေးဂိုးမရှိအောင် ကစားနိုင်ခဲ့တဲ့အသင်းအဖြစ် အာဆင်နယ်အသင်းနဲ့အတူ ရပ်တည်နေပါတယ်။
အခုပွဲစဉ်မှာ အနိုင်ရခဲ့တဲ့ လီဗာပူး အသင်းဟာ ပရီးမီးယားလိဂ်(၂)ပွဲကစားပြီးချိန်မှာ ရမှတ်(၆)မှတ်နဲ့အတူ အမှတ်ပေးဇယားရဲ့ အဆင့်(၄)နေရာမှာ ရပ်တည်နေပါတယ်။
