အိုလံပစ်နဲ့ ကမ္ဘာ့ချန်ပီယံ အမေရိကန်လက်ဝှေ့သမား ဂျော့ချ်ဖိုမင်ဟာ မတ်လ ၂၁ ရက်က ကွယ်လွန်သွားတယ်လို့ ဖိုမင်ရဲ့ မိသားစုက အတည်ပြုခဲ့ပါတယ်။ ၁၉၄၉ ခုနှစ် ဇန်နဝါရီ ၁၀ ရက်မှာ မွေးဖွားခဲ့တဲ့ ဖိုမင်ဟာ ကွယ်လွန်ချိန် မှာ အသက် ၇၆ နှစ်ရှိပြီ ဖြစ်ပါတယ်။
အမေရိကန်နိုင်ငံ တက္ကဆက်ပြည်နယ်မှာ မွေးဖွားခဲ့တဲ့ ဖိုမင်ဟာ အသက် ၁၆ နှစ်အရွယ်မှာ ကာလီဖိုးနီးယားကို ပြောင်းရွှေ့ခဲ့ပြီးနောက် လက်ဝှေ့လေ့ကျင့်မှုတွေကို စတင်ခဲ့တာပါ။ ၁၉၆၈ မက္ကဆီကို အိုလံပစ်မှာ ရွှေတံဆိပ်ဆုကို ရယူနိုင်ခဲ့ပြီးနောက် ဖိုမင်ရဲ့နာမည်က လက်ဝှေ့ကမ္ဘာမှာကျော်ကြား လာခဲ့ ပါတယ်။ ၁၉၆၉ မှာတော့ ဖိုမင်ဟာ ပရော်ဖက်ရှင်နယ် လက်ဝှေ့ကစားသမားဘဝကို စတင်ခဲ့ပြီး ၁၉၇၂ မှာ ဟဲဗီးဝိတ်တန်း ကမ္ဘာ့ချန်ပီယံ ဖရေဇီယာကို အလဲထိုးကာ ဟဲဗီးဝိတ်တန်း ကမ္ဘာ့ချန်ပီယံဆုကို ရယူနိုင်ခဲ့ပါတယ်။
၁၉၇၄ အောက်တိုဘာမှာ ထိုးသတ်ခဲ့တဲ့ မိုဟာမက်အလီနဲ့ပွဲမှာတော့ ရှုံးနိမ့်ခဲ့ပေမဲ့ ဖိုမင်ရဲ့ ကစားသမားဘဝ နာမည်အကြီးဆုံးပွဲဖြစ်သလို သမိုင်းမှာ ပြန်ပြောင်းပြောပြစရာ ပွဲတစ်ပွဲ ဖြစ်ခဲ့ပါတယ်။ ၁၉၉၇ နိုဝင်ဘာမှာ နောက်ဆုံးပွဲကို ထိုးသတ်ခဲ့တဲ့ ဖိုမင်ဟာ ပရိုကစားသမားဘဝ ၈၁ ပွဲထိုးသတ်ခဲ့ရာမှာ အလဲထိုးနိုင်ပွဲ ၆၈ ပွဲ အပါအဝင် နိုင်ပွဲ ၇၆ ပွဲ အထိ ရရှိထားခဲ့သူဖြစ်ပါတယ်။
