ရှန်ဟိုင်းမာစတာ တင်းနစ်ပြိုင်ပွဲမှာ ချန်ပီယံဆုကို ၄ ကြိမ်ရရှိထားတဲ့ ဆားဘီးယားနိုင်ငံသား ဂျိုကိုဗစ်ဟာ အခုနှစ် ပြိုင်ပွဲမှာလည်း စတုတ္ထအဆင့်ကို တက်သွားခဲ့ပါတယ်။
အောက်တိုဘာလ ၈ ရက်နေ့က ယှဉ်ပြိုင်ခဲ့တဲ့ တတိယ အဆင့်ပွဲမှာ ဂျိုကိုဗစ်ဟာ အီတလီနိုင်ငံသား ကိုဘိုလီနဲ့ ဆုံတွေ့ခဲ့ရတာဖြစ်ပြီး ကမ္ဘာ့အဆင့်-၂ ဂျိုကိုဗစ်အတွက် အခုပွဲစဉ်က သက်သောင့်သက်သာရှိခဲ့တာပါ။
ဆီဒင်အဆင့်-၂၈ ရထားတဲ့ ကိုဘိုလီက အကောင်းဆုံးကြိုးစားခဲ့ ပေမယ့် ဂျိုကိုဗစ်ရဲ့ အတွေ့အကြုံနဲ့လက်စွမ်းကိုတော့ မယှဉ်နိုင်ခဲ့ဘဲ အရှုံးပေးခဲ့ရပါတယ်။
ပွဲကစားချိန် (၁)နာရီနဲ့ ၃ မိနစ်သာ ကြာမြင့်ခဲ့ပြီးနောက် ဂျိုကိုဗစ်က (၆း၁၊၆း၂)ဆိုတဲ့ရလဒ်နဲ့ အနိုင်ရခဲ့ပြီး စတုတ္ထအဆင့်ကို တက်ရောက် သွားခဲ့တာဖြစ်ပါတယ်။

ဆီဒင်အဆင့်-၄ ရထားတဲ့ ဂျိုကိုဗစ်ဟာ စတုတ္ထအဆင့်မှာ ရုရှားနိုင်ငံသား ဆာဖျူလင်နဲ့ ဆက်လက် ယှဉ်ပြိုင်ရမှာဖြစ်ပါတယ်။
ဆာဖျူလင်ကတော့ တတိယအဆင့်မှာ ဆီဒင်အဆင့်-၁၃ ရထားတဲ့ အမေရိကန်နိုင်ငံသား တီယာဖိုကို အကြိတ်အနယ်ကစားပြီး အနိုင်ယူကျော်ဖြတ်လာခဲ့တာဖြစ်ပါတယ်။
ဂျိုကိုဗစ်ဟာ ဆာဖျူလင်နဲ့ အခုပွဲစဉ်မတိုင်ခင် နှစ်ကြိမ်ဆုံတွေ့ခဲ့ဖူးပြီး နှစ်ကြိမ်စလုံးမှာ အနိုင်ရထားခဲ့တာဖြစ်လို့ အခုပွဲစဉ်မှာလည်း အနိုင်ရပြီး ကွာတားဖိုင်နယ်အဆင့်ကို တက်ရောက်မယ်လို့ ခန့်မှန်းမှုတွေရှိနေပါတယ်။