ဂျပန်ဆယ်ကျော်သက် စကိတ်စီးမယ် ယိုရှီဇာဝါဟာ ဇွန်လ ၂၃ ရက်နေ့က ဘူဒါပက်စ်မြို့မှာ ကျင်းပခဲ့တဲ့ အိုလံပစ် အရည်အချင်းစစ်ပွဲမှာ အနိုင်ရခဲ့ပြီးနောက် လာမယ့် ပဲရစ်အိုလံပစ်ပြိုင်ပွဲကို ဝင်ပြိုင်ခွင့် ရသွားခဲ့ပါတယ်။
အသက် ၁၄ နှစ်အရွယ် ယိုရှီဇာဝါဟာ ဗိုလ်လုပွဲအဆင့်မှာ အခြား ဂျပန်စကိတ်စီးမယ်တွေဖြစ်တဲ့ အိုဒါနဲ့ အကြိတ်အနယ် ယှဉ်ပြိုင်ခဲ့ရတာဖြစ်ပြီး နောက်ဆုံးအစွမ်းပြခွင့်မှာ အကောင်းဆုံးပုံစံကောင်းနဲ့အတူ အမှတ်တွေရယူနိုင်ခဲ့တာ ဖြစ်ပါတယ်။
ဒါ့ကြောင့်လည်း စုစုပေါင်းရမှတ်မှာ ယိုရှီဇာဝါက ၂၇၀ ဒသမ ၂၉ မှတ်နဲ့ အမှတ်အများဆုံးဖြစ်ခဲ့သလို အိုလံပစ်ပြိုင်ပွဲဝင်ခွင့်တစ်နေရာကိုပါ ရရှိသွားခဲ့တာဖြစ်ပါတယ်။
အမျိုးသားစကိတ်ဘုတ်ပြိုင်ပွဲမှာတော့ အိုလံပစ် ချန်ပီယံ ဩစတြေးလျနိုင်ငံသား ပယ်လ်မာက အကောင်းဆုံးပုံစံနဲ့အတူ အမှတ်တွေရယူနိုင်ခဲ့ပြီး ချန်ပီယံဆုကို ရရှိသွားခဲ့တာ ဖြစ်ပါတယ်။
ပယ်လ်မာဟာ အိုလံပစ်ပြိုင်ပွဲဝင်ခွင့်ရဖို့အတွက် အခုပြိုင်ပွဲမှာ အနိမ့်ဆုံး ဒုတိယ နေရာရဖို့ကို လိုအပ်ခဲ့တာဖြစ်ပေမယ့် အနိုင်ရသွားခဲ့တာကြောင့် လာမယ့် ပဲရစ်အိုလံပစ် စကိတ်ဘုတ်ပြိုင်ပွဲမှာ ချန်ပီယံဆုကို ကာကွယ်ခွင့်ရတော့မှာလည်း ဖြစ်ပါတယ်။
