အဋ္ဌမအကြိမ် နိုင်ငံတော်သံဃမဟာနာယကအဖွဲ့ (၄၇)ပါးစုံညီ ဧကူနဝီသတိမအစည်းအဝေးကို လာမယ့်ဖေဖော်ဝါရီလနဲ့ အဋ္ဌမအကြိမ် နိုင်ငံတော်ဗဟိုသံဃာ့ဝန်ဆောင်အဖွဲ့ သတ္တမအစည်းအဝေးကို လာမယ့်မတ်လမှာ ရန်ကုန်မြို့၊ သီရိမင်္ဂလာကမ္ဘာအေးကုန်းမြေမှာ ကျင်းပသွားမှာဖြစ်တယ်လို့ သာသနာရေးဦးစီးဌာနကနေ သိရပါတယ်။
အဋ္ဌမအကြိမ် နိုင်ငံတော်သံဃမဟာနာယကအဖွဲ့ (၄၇)ပါးစုံညီ ဧကူနဝီသတိမအစည်းအဝေးရဲ့ အကြိုညှိနှိုင်းအစည်းအဝေးကို ဖေဖော်ဝါရီ ၂၃ရက်ကနေ ၂၆ရက်အထိ ကျင်းပမှာဖြစ်ပြီး အစည်းအဝေးကြီးကို ဖေဖော်ဝါရီ ၂၇ရက်နဲ့ ၂၈ရက်နေ့တွေမှာ ကျင်းပမှာဖြစ်တယ်လို့ ဆိုပါတယ်။အစည်းအဝေးကြီးကို တက်ရောက်မယ့် နိုင်ငံတော်သံဃမဟာနာယကအဖွဲ့ ဆရာတော်ကြီးတွေအနေနဲ့ ဖေဖော်ဝါရီ၂၂ရက်မှာ ရန်ကုန်မြို့၊ သီရိမင်္ဂလာကမ္ဘာအေးကုန်းမြေကို ကြွရောက်တော်မူဖို့ ပင့်လျှောက်ထားပြီးဖြစ်တယ်လို့ သိရပါတယ်။
အဋ္ဌမအကြိမ် နိုင်ငံတော်ဗဟိုသံဃာ့ဝန်ဆောင်အဖွဲ့ သတ္တမအစည်းအဝေးကိုလည်း မတ်လ၂ရက်ကနေ ၄ရက်အထိ ကျင်းပသွားမှာဖြစ်တဲ့အတွက် နိုင်ငံတော်ဩဝါဒါစရိယ ဆရာတော်ကြီးတွေနဲ့ နိုင်ငံတော်ဗဟိုသံဃာ့ဝန်ဆောင် ဆရာတော်ကြီးတွေအနေနဲ့ မတ်လ၁ရက်မှာ ရန်ကုန်မြို့၊ သီရိမင်္ဂလာကမ္ဘာအေးကုန်းမြေကို ကြွရောက်တော်မူဖို့ ပင့်လျှောက်ထားပြီးဖြစ်တယ်လို့ သိရပါတယ်။ပင့်လျှောက်စာတွေအချိန်မီမရောက်ရှိရင်လည်း အဲ့ဒီနေ့ရက်တွေအတိုင်း ရန်ကုန်မြို့၊ သီရိမင်္ဂလာကမ္ဘာအေးကုန်းမြေကို ကြွရောက်တော်မူဖို့ ပင့်လျှောက်အပ်ပါတယ်လို့ သာသနာရေးဦးစီးဌာနကနေ သိရပါတယ်။
