ပျံလွန်တော်မူခဲ့တဲ့ ပုပ်ရဟန်းမင်းကြီး ဖရန်စစ် အရှင်သူတော်မြတ်အတွက် ဆုတောင်းပွဲကို ရန်ကုန်မြို့ စိန့်မေရီ ကာသီဒြယ် ဘုရားကျောင်းမှာ ဧပြီ ၂၂ ရက်၊ ညနေ ၅ နာရီကျော်က ကျင်းပခဲ့ပါတယ်။ဆုတောင်းပွဲကိုတော့ မြန်မာနိုင်ငံ ကက်သလစ် သာသနာတော်ရဲ့ ရန်ကုန်ဂိုဏ်းချုပ် ဆရာတော်ကြီး ကာဒီနယ် ချားလ်ဘိုနဲ့အတူ ဆရာတော်တွေ ရဟန်းတော်တွေက အတူတကွ ပူဇော်ခဲ့ကြတာပါ။
ဆုတောင်းပွဲအခမ်းအနားကိုလည်း တောင်ကိုရီးယား၊ ဘရာဇီး၊ တီမော၊ ဆွစ်ဇာလန်၊ အီတလီ၊ ဗြိတိန်၊ အင်ဒိုနီးရှား၊ ဖိလစ်ပိုင်နဲ့ အစ္စရေး နိုင်ငံတွေက သံအမတ်ကြီးတွေနဲ့ တာဝန်ရှိသူတွေ တက်ရောက်ကြသလို ဘာသာဝင်တွေလည်း တက်ရောက်ပူဇော်ကြပါတယ်။ပုပ်ရဟန်းမင်းကြီး ဖရန်စစ် ပျံလွန်သွားတဲ့အပေါ် ဝမ်းနည်းပေမယ့် ကောင်းရာကို ရောက်သွားမယ်ဆိုတာကို ယုံ ကြည်တယ်လို့ မြန်မာနိုင်ငံ ကက်သလစ် သာသနာတော်၏ ရန်ကုန်ဂိုဏ်းချုပ် ဆရာတော်ကြီး ကာဒီနယ် ချားလ်ဘို က မိန့်ကြားပါတယ်။
စိန့်မေရီ ကာသီဒြယ်ဘုရားကျောင်း ဂျူဘီလီတံခါးဘက်မှာ ပုပ်ရဟန်းမင်းကြီး ဖရန်စစ်အတွက် ဝမ်းနည်းကြောင်း အထိမ်းအမှတ် မှတ်တမ်းစာအုပ်မှာ လက်မှတ်ရေးထိုးနိုင်ဖို့နဲ့ လွမ်းသူ့ပန်းခွေ ပန်းခြင်းတွေ ထားရှိနိုင်ဖို့ ပြင်ဆင် ပေးထားပြီး တစ်ပတ်ခန့်ကြာ ထားရှိထားမယ်လို့ သိရပါတယ်။အဲဒီအပြင် ပုပ်ရဟန်းမင်းကြီးရဲ့ အသုံးဆောင်ပစ္စည်းတချို့ကိုလည်း ပြသထားတယ်လို့ သိရပါတယ်။ရိုမန်ကက်သလစ်ချာ့ချ်ရဲ့ ပထမဆုံး လက်တင်အမေရိက ခေါင်းဆောင် ပုပ်ရဟန်းမင်းကြီး ဖရန်စစ်ဟာ ဧပြီလ ၂၁ ရက်မှာ ပျံလွန်သွားတာ ဖြစ်ပါတယ်။
