၃၃ ရက်ကြာ ကျင်းပပြီးစီးခဲ့တဲ့ (၇၇)ကြိမ်မြောက် တိပိဋကဓရ တိပိဋကကောဝိဒ ရွေးချယ်ရေး စာမေးပွဲကြီးကနေ တိပိဋကဓရ တိပိဋကကောဝိဒ သာနာ့အာဇာနည် ဆရာတော် တစ်ပါး ထပ်မံ ပေါ်ထွန်းလာတယ်လို့ သာသနာရေး ဦးစီးဌာနကနေ သိရပါတယ်။ အခုပေါ်ထွန်းလာတဲ့ သာသနာ့အာဇာနည် ဆရာတော်က ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)မြို့နယ်၊ တိပိဋက မဟာဂန္ထဝင်နိကာယ်ကျောင်းတိုက်မှာ သီတင်းသုံးတော်မူတဲ့ အရှင် သေဋ္ဌဉာဏာလင်္ကာရ ဖြစ်တယ်လို့ ဆိုပါတယ်။ ဆရာတော်ဟာ သက်တော် ၄၅ နှစ်၊ သိက္ခာတော် ၂၃ ဝါ ရှိပြီ ဖြစ်တယ်လို့ သိရပါတယ်။
တိပိဋကဓရ တိပိဋကကောဝိဒ ရွေးချယ်ရေးစာမေးပွဲကြီးမှာ ဝိနယပိဋက ဝိနည်းပထမပိုင်းနှစ်ကျမ်း၊ ဝိနယပိဋက ဝိနည်းဒုတိယပိုင်း သုံးကျမ်း၊ သုတ္တန္တပိဋက ဒီဃနိကာယ် သုံးကျမ်း၊ အဘိဓမ္မပိဋက အဘိဓမ္မာပထမပိုင်း ငါးကျမ်းနဲ့ အဘိဓမ္မ ပိဋက အဘိဓမ္မာ ဒုတိယပိုင်း နှစ်ကျမ်းတို့ကို တိပိဋက ဘွဲ့အတွက် အာဂုံပြန်ဆိုရပြီး တိပိဋက ကောဝိဒ ဘွဲ့ အတွက် သဘောရေးဖြေ စာမေးပွဲ ဖြေဆိုရတယ်လို့ သိရပါတယ်။
တိပိဋကဓရ တိပိဋကကောဝိဒ ဘွဲ့တံဆိပ်တော်ရရှိတဲ့ ဆရာတော်ထံ နစက ဥက္ကဋ္ဌ နိုင်ငံတော် ဝန်ကြီးချုပ် ဗိုလ် ချုပ်မှူးကြီး မင်းအောင်လှိုင်က ဆက်ကပ်ပေးပို့တဲ့ ဂုဏ်ယူ ဝမ်းမြောက်ကြောင်း သဝဏ်လွှာကို ဇန်နဝါရီ ၂၆ ရက် မွန်းလွဲပိုင်းက သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးတင်ဦးလွင်၊ ရန်ကုန်တိုင်းဒေသ ကြီး ဝန်ကြီးချုပ် ဦးစိုးသိန်းနဲ့ တာဝန်ရှိသူတွေ သွားရောက် ဆက်ကပ်လှူဒါန်းခဲ့ပါတယ်။
(၇၇)ကြိမ်မြောက် တိပိဋကဓရ တိပိဋကကောဝိဒ ရွေးချယ်ရေးစာမေးပွဲကြီး ပြီးတဲ့အချိန်ထိ တိပိဋကဓရ တိပိဋက ကောဝိဒ သာသနာ့အာဇာနည် ၁၇ ပါး ပေါ်ထွန်းခဲ့ပြီဖြစ်ပြီး ပထမဆုံး တိပိဋကဓရ တိပိဋက ကောဝိဒ ဆရာတော် ကတော့ မင်းကွန်းဆရာတော်ဘုရားကြီး ဖြစ်တယ်လို့ သိရပါတယ်။
