ရှမ်းပြည်နယ်(အရှေ့ပိုင်း)၊ တာချီလိတ်မြို့မှာ (၇၈) နှစ်မြောက် ရှမ်းပြည်နယ်နေ့ အထိမ်းအမှတ် အခမ်းအနားကို ဖေဖော်ဝါရီလ ၆ ရက်နဲ့ ၇ ရက်မှာ တာချီလိတ်မြို့၊ ဆေးခမ်းရပ်ကွက်၊ ရှမ်းကွင်းရှိ ရှမ်းစာပေနှင့် ယဉ်ကျေးမှုအသင်းခန်းမမှာ နှစ်ရက်ကြာ ကျင်းပခဲ့ပါတယ်။အခမ်းအနားပထမနေ့ဖြစ်တဲ့ဖေဖော်ဝါရီလ ၆ ရက်၊ မနက်ပိုင်းက တာချီလိတ်မြို့၊ မဟာဗောဓိကမ္မဋ္ဌာန်းတိုက်ဆရာတော်က ငါးပါးသီလချီးမြှင့်ပြီး တက်ရောက်လာသူတွေက ဆရာတော်သံဃာတော်တွေ ရွတ်ဖတ်ပူဇော်တဲ့ ပရိတ်တရားတော်တွေကို နာယူကြည်ညိုခဲ့ကြပါတယ်။
အဲဒီနောက် တာတိုအပြေးပြိုင်ပွဲ၊ လွန်ဆွဲပွဲ၊ လျှောတိုင်တက်ပွဲ၊ ဝါးခြေထောက်ပြိုင်ပွဲ၊ ဒိုးသီးပစ်ပွဲ၊ ဂျင်ပစ်ပြိုင်ပွဲ၊ ခေါင်းအုံးရိုက်ပြိုင်ပွဲ၊ စက်ဘီးပြိုင်ပွဲ၊ အကပြိုင်ပွဲနဲ့ အိုးစည်ဗုံမောင်းတီးပြိုင်ပွဲ စတဲ့ အာကစားပြိုင်ပွဲတွေကိုကျင်းပခဲ့ပြီး တာချီလိတ်မြို့နယ်အတွင်းရှိ ရပ်ကွက်၊ ကျေးရွာတွေက ဒေသခံတွေ ပျော်ရွှင်စွာ ပါဝင်ဆင်နွှဲခဲ့တယ်လို့ ဆိုပါတယ်။
အခမ်းအနား ဒုတိယနေ့၊ ဖေဖော်ဝါရီလ ၇ ရက်မှာတော့ ခေတ္တခရိုင်အုပ်ချုပ်ရေးမှူး ဦးသက်ဦးဆွေက (၇၈)နှစ်မြောက် ရှမ်းပြည်နယ်နေ့အခမ်းအနားကို နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ပေးပို့တဲ့သဝဏ်လွှာကို ဖတ်ကြားပြီး မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးကျော်စွာမျိုးက ရှမ်းပြည်နယ်ဝန်ကြီးချုပ် ဦးအောင်အောင် ပေးပို့လာတဲ့သဝဏ်လွှာကို ဖတ်ကြားပါတယ်။
ဆက်လက်ပြီး ရှမ်းစာပေယဉ်ကျေးမှုအသင်း ဒုတိယ ဥက္ကဋ္ဌ ဦးစိုင်းရီစံခတ်က ရှမ်းပြည်နယ်နေ့ ဖြစ်ပေါ်လာပုံ သမိုင်းကြောင်းကို ရှင်းလင်း ပြောကြားပြီး တိုင်းရင်းသားယဉ်ကျေးမှုအဖွဲ့တွေက ရိုးရာအကအလှတွေနဲ့ ကပြဖျော်ဖြေပါတယ်။အဲဒီနောက် ရှမ်းရိုးရာအက ပြိုင်ပွဲမှာဆုရရှိသူတွေ၊ အားကစားပြိုင်ပွဲတွေမှာ ဆုရရှိသူတွေ၊ အခမ်းအနားဖြစ်မြောက်ရေးအတွက် အလှူရှင်တွေကို တာဝန်ရှိသူတွေက ဂုဏ်ပြုဆုငွေနဲ့ ဂုဏ်ပြုမှတ်တမ်းလွှာတွေကို အသီးသီးချီးမြှင့်ခဲ့ကြတယ်လို့ သိရပါတယ်။
