မှုခင်းဖော်ထုတ်ရေးအပိုင်းမှာ သဲလွန်စကောက်ယူတဲ့အခါ CCTV တွေမှာ AI နည်းပညာထည့်သွင်းအသုံးပြုပြီး မှုခင်းသဲလွန်စတွေရှာဖွေဖို့ ဆောင်ရွက်နေတယ်လို့ နစကအဖွဲ့ဝင်၊ NSPNC ဥက္ကဋ္ဌ၊ နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်က ပြောပါတယ်။မတ်လ၂၆ ရက်က နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန (NSPC)မှာ ကျင်းပတဲ့ ငြိမ်းချမ်းရေးစကားဝိုင်းဆွေးနွေးပွဲ တတိယနေ့မှာ ဒုတိယဗိုလ်ချုပ်ကြီးရာပြည့်က အခုလို ဆွေးနွေးပြောကြားလိုက်တာပါ။
မှုခင်းသဲလွန်စတွေကို ဖော်ထုတ်တဲ့နေရာမှာ CCTV ကို အဓိက အားကိုးရတာဖြစ်တယ်လို့ ဆိုပါတယ်။တစ်နိုင်ငံလုံးက CCTV တွေနဲ့ ချိတ်ဆက်ပြီး AI နည်းပညာအသုံးပြုကာ လူကောင်းနဲ့လူဆိုး ခွဲခြားသိနိုင်ဖို့ စီမံဆောင်ရွက်နေတယ်လို့ ဒုတိယဗိုလ်ချုပ်ကြီးရာပြည့်က ပြောပါတယ်။ မြန်မာနိုင်ငံရဲတပ်ဖွဲ့ကိုလည်း နည်းပညာအထောက်အကူပြုရဲတပ်ဖွဲ့၊ ပြည်သူလူထုအခြေပြုရဲတပ်ဖွဲ့အဖြစ် ပြုပြင် ပြောင်းလဲနေတယ်လို့ ဒုတိယဗိုလ်ချုပ်ကြီးရာပြည့်က ပြောကြားခဲ့ပါတယ်။
