ရန်ကုန်နှင့်မန္တလေးတွင် ကျပ် ၂ ဘီလီယံခွဲနီးပါးမူးယစ်ဆေးဝါးများဖမ်းမိ

ရန်ကုန်တိုင်းဒေသကြီးနဲ့ မန္တလေးတိုင်းဒေသကြီးတွေမှာ ငွေကျပ် ၂ ဘီလီယံခွဲနီးပါးတန်ဖိုးရှိတဲ့ မူးယစ်ဆေးဝါးတွေ ဖမ်းဆီးရမိခဲ့တယ်လို့ မြန်မာနိုင်ငံရဲတပ်ဖွဲ့က စက်တင်ဘာ ၁၆ ရက်မှာထုတ်ပြန်ပါတယ်။

ရန်ကုန်တိုင်းဒေသကြီး၊ ဒဂုံမြို့သစ် (မြောက်ပိုင်း)မြို့နယ်၊ (၄၁) ရပ်ကွက်မှာ စက်တင်ဘာလ ၈ ရက်က ကြိုတင်သတင်းအရ အမျိုးသားတစ်ယောက်ကို ရှာဖွေစစ်ဆေးရာ စိတ်ပြောင်းဆေးဝါးတွေဖြစ်တဲ့ ကက်တမင်း ၁ ကီလို၊ Happy Water ၁၀၅ ဂရမ်နဲ့အတူဖမ်းဆီးရမိခဲ့တယ်လို့ ထုတ်ပြန်ချက်အရသိရပါတယ်၊၊

စစ်ဆေးဖော်ထုတ်ချက်အရ မူးယစ်ဆေးဝါးတွေသယ်ဆောင်ရောင်းဝယ်ရာမှာ ပူးပေါင်းပါဝင်သူ နောက်ထပ်အမျိုးသားတစ်ယောက်ကို ဒဂုံမြို့သစ်(မြောက်ပိုင်း)မြို့နယ်၊ ၄၁ (တိုးချဲ့)ရပ်ကွက်မှာ မူးယစ်ဆေးဝါးတွေနဲ့အတူ ဖမ်းဆီးရမိခဲ့သလို စက်တင်ဘာလ ၁၂ ရက်ကလည်း မန္တလေးတိုင်းဒေသကြီး၊ ချမ်းမြသာစည်မြို့နယ်မှာ အမျိုးသားနှစ်ယောက်ကိုစိတ်ကြွရူးသွပ်ဆေးပြား ၉ ဒသမ ၂ သိန်းနဲ့အတူဖမ်းဆီးရမိခဲ့တယ်လို့ ထုတ်ပြန်ချက်မှာပါရှိပါတယ်။

ဖမ်းမိသူတွေကို မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အရေးယူထားရှိပြီး ကွင်းဆက် ပြစ်မှုကျူးလွန်သူတွေကို ဆက်လက်စစ်ဆေးဖော်ထုတ်နေတယ်လို့သိရပါတယ်။