မန္တလေးမြို့မှာ ဆိုင်ကယ်လုယက်မှုတွေ အကြိမ်ကြိမ်ကျူးလွန်ခဲ့တဲ့ အမျိုးသားခြောက်ယောက်ကို ဖမ်းမိခဲ့တယ်လို့ မြန်မာနိုင်ငံရဲတပ်ဖွဲ့က သတင်းထုတ်ပြန်ပါတယ်။
အဲဒီလိုဖမ်းမိရာမှာ အသက်၁၆နှစ်အရွယ်လူငယ်အမျိုးသားအပါအဝင် အမျိုးသားလေးယောက်ကို ဇန်နဝါရီ၂၃ရက်၊ နေ့လယ်၁၂နာရီခွဲက ပြည်ကြီးတံခွန်မြို့နယ်က ဘီယာဆိုင်တစ်ဆိုင်မှာ ဖမ်းမိခဲ့ပြီး နောက်ထပ်၂ယောက်ကို မွန်းလွဲ၂နာရီခွဲက အအေးဆိုင်တစ်ဆိုင်မှာ ဖမ်းမိခဲ့တာဖြစ်သလို သူတို့လုယက်ယူဆောင်လာတဲ့ ဆိုင်ကယ်၂စီးနဲ့အတူ ဖမ်းမိခဲ့တာဖြစ်တယ်လို့ ဆိုပါတယ်။စစ်ဆေးဖော်ထုတ်ချက်အရ အခုဖမ်းမိထားသူခြောက်ယောက်ဟာ ၂၀၂၄ခုနှစ် ဩဂုတ်လကနေ ဒီဇင်ဘာလအထိ ဆိုင်ကယ်လုယက်မှု ၁၇ကြိမ်၊ ၂၀၂၅ခုနှစ်၊ ဇန်နဝါရီလအတွင်း ဆိုင်ကယ်လုယက်မှု၄ကြိမ် ကျူးလွန်ခဲ့တာကို ကနဦးသိရှိရတယ်လို့ သိရပါတယ်။
လုယက်ယူဆောင်လာတဲ့ ဆိုင်ကယ်တွေကို ဖမ်းမိဖို့ကျန်နေတဲ့ အမျိုးသားနှစ်ယောက်ထံ ဆက်သွယ်ရောင်းချခဲ့တယ်လို့လည်း ဆိုပါတယ်။ဒီဖြစ်စဉ်နဲ့ပတ်သက်ပြီး ဖမ်းမိထားတဲ့အမျိုးသားခြောက်ယောက်ကို ဥပဒေအရ အရေးယူထားပြီး နောက်ထပ်ကျူးလွန်ခဲ့တဲ့လုယက်မှုတွေရှိ၊မရှိ စစ်ဆေးဖော်ထုတ်နေသလို ဖမ်းမိဖို့ကျန်နေတဲ့အမျိုးသားနှစ်ယာက်ကို ဖမ်းမိနိုင်ရေး ဆောင်ရွက်နေတယ်လို့ သတင်းထုတ်ပြန်ထားပါတယ်။
