ကရင်ပြည်နယ်၊ မြဝတီ-ရွှေကုက္ကိုလ်နဲ့ KK Park နယ်မြေတွေမှာ တရားမဝင် ဝင်ရောက်လာတဲ့ ပြည်ပနိုင်ငံသား ၂၇၃ ယောက်ကို ထပ်မံ စစ်ဆေးဖော်ထုတ် ထိန်းသိမ်းနိုင်ခဲ့တယ်လို့ နစက သတင်းထုတ်ပြန်ရေးအဖွဲ့က ထုတ်ပြန် ပါတယ်။ ဇန်နဝါရီ ၃၀ ရက်ကနေ ဖေဖော်ဝါရီ ၁၇ ရက်အထိ မြဝတီ-ရွှေကုက္ကိုလ်နဲ့ KK Park နယ်မြေအတွင်း တရားမဝင် အွန်လိုင်းလောင်းကစားမှုတွေ၊ အွန်လိုင်းလိမ်လည်မှုတွေနဲ့ ဒုစရိုက်မှုတွေ ကျူးလွန်ခဲ့ကြသူတွေကို စစ်ဆေးဖော်ထုတ်ခဲ့ရာ ပြည်ပနိုင်ငံသား ၁၃၀၃ ယောက်ကို ထိန်းသိမ်းနိုင်ခဲ့တာလို့ ဆိုပါတယ်။
မြဝတီမြို့မှာ ထိန်းသိမ်းထားတဲ့ ပြည်ပနိုင်ငံသားတွေကို သက်ဆိုင်ရာနိုင်ငံတွေကို အမြန်ဆုံး လွှဲပြောင်းပေးအပ် နိုင်ရေးအတွက် မြန်မာ-တရုတ်-ထိုင်းနိုင်ငံတို့က သုံးနိုင်ငံ ကိုယ်စားလှယ်တွေဟာ ဖေဖော်ဝါရီ ၁၇ ရက်က သုံးပွင့် ဆိုင် တွေ့ဆုံဆွေးနွေး ညှိနှိုင်းခဲ့ကြတယ်လို့ သိရပါတယ်။ထိန်းသိမ်းခဲ့တဲ့ ပြည်ပနိုင်ငံသားတွေဟာ ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်းပြီး မြန်မာနိုင်ငံအတွင်းကို နယ်စပ်လမ်းကြောင်းတွေကတစ်ဆင့် တရားမဝင် ဝင်ရောက်လာသူတွေ ဖြစ်တယ်လို့ ဆိုပါတယ်။
ဒါ့အပြင် ထိန်းသိမ်းထားတဲ့ ပြည်ပနိုင်ငံသားတွေကို ဥပဒေ လုပ်ထုံးလုပ်နည်းတွေနဲ့အညီ သက်ဆိုင်ရာ နိုင်ငံတွေကို ပြန်လည်လွှဲပြောင်းပေးအပ်နိုင်ရေး လိုအပ်တဲ့ ကိုယ်ရေးအချက်အလက်တွေနဲ့ မှတ်တမ်းတွေကို စာရင်းကောက်ယူပြီး ဖြစ်တယ်လို့လည်း ထုတ်ပြန်ချက်မှာ ပါရှိပါတယ်။နိုင်ငံတော်အနေနဲ့လည်း မြဝတီ-ရွှေကုက္ကိုလ်နဲ့ KK Park နယ်မြေအတွင်း အွန်လိုင်းလိမ်လည်မှုတွေ၊ အွန်လိုင်း လောင်းကစားမှုတွေနဲ့ ဒုစရိုက်မှုတွေ ကျူးလွန်ခဲ့ကြတဲ့ ပြည်ပနိုင်ငံသားတွေကို အမြန်ဆုံး စစ်ဆေးဖော် ထုတ်ပြီး သက်ဆိုင်ရာ နိုင်ငံတွေကို လွှဲပြောင်းပေးအပ်နိုင်ရေး တက်ကြွစွာ ပူးပေါင်းဆောင်ရွက်နေတယ်လို့ ထုတ်ပြန် ထားပါတယ်။
