ရှမ်းပြည်နယ်(မြောက်ပိုင်း)၊ မူဆယ်မြို့ပေါ်မှာ အွန်လိုင်းလိမ်လည်မှု(ကျားဖြန့်)လုပ်ငန်းတွေလုပ်ကိုင်နေတဲ့ တရုတ်နိုင်ငံသား တရားခံပြေး ၄၅ ယောက်အပါအဝင် တရုတ်နိုင်ငံသားစုစုပေါင်း ၃၁၃ ယောက်ကို စက်တင်ဘာလအတွင်းက ဖမ်းမိခဲ့ပြီး စက်တင်ဘာ ၂၆ ရက်က တရုတ်နိုင်ငံကို ပြည်နှင်လွှဲပြောင်းပေးခဲ့တယ်လို့ နစက သတင်းထုတ်ပြန်ရေးအဖွဲ့က ထုတ်ပြန်ပါတယ်။
အဲဒီတရုတ်နိုင်ငံသားတွေနဲ့အတူ မြန်မာနိုင်ငံသား ၅၅၇ ယောက်ကိုပါဖမ်းမိခဲ့ပြီး အွန်လိုင်းလိမ်လည်မှုပြုလုပ်ရာမှာ အသုံးပြုတဲ့သက်သေခံပစ္စည်းတွေကိုပါ သိမ်းဆည်းရမိခဲ့တဲ့အတွက် အမှုဖွင့်အရေးယူဆောင်ရွက်နေသလို ဒုစရိုက်မှုတွေအခြေပြုဆောင်ရွက်နေတဲ့ အဆောက်အဦတွေကိုလည်း ချိတ်ပိတ်သိမ်းဆည်းသွားမှာဖြစ်တယ်လို့ ဆိုပါတယ်။
ဖမ်းမိခဲ့တဲ့ တရုတ်နိုင်ငံသား ၃၁၃ ယောက်ကို တရုတ်နိုင်ငံအနေနဲ့ ဆက်လက်အရေးယူဆောင်ရွက်နိုင်ဖို့အတွက် လုံလောက်တဲ့အစောင့်အရှောက်တွေနဲ့ စက်တင်ဘာ ၂၆ ရက်က ယူနန်ပြည်နယ်၊ ရွှေလီမြို့ နယ်စပ် ဝင်/ထွက် ပေါက်ကတစ်ဆင့် လုပ်ထုံးလုပ်နည်းတွေနဲ့အညီ ပြည်နှင်လွှဲပြောင်းပေးခဲ့ပါတယ်။
မြန်မာနိုင်ငံရဲ့နယ်စပ်ဒေသတွေမှာ အွန်လိုင်းလိမ်လည်မှုတွေ၊ အွန်လိုင်းလောင်းကစားလုပ်ငန်းတွေ တားဆီးကာကွယ်တိုက်ဖျက်နိုင်ဖို့အတွက် အိမ်နီးချင်းနိုင်ငံတွေနဲ့ပူးပေါင်းပြီး ဆက်လက်ကြိုးပမ်းဆောင်ရွက်သွားမယ်လို့လည်း ထုတ်ပြန်ထားပါတယ်။
