နိုင်ငံကျော် အဆိုတော်မာရဇ္ဇ(ခေါ်)မာကြီးဟာ ဇန်နဝါရီ ၂၃ ရက်၊ ည(၁၁)နာရီ(၅)မိနစ်အချိန်လောက်က ရန်ကုန်မြို့၊ ဗဟိုရ်စည်ဆေးရုံမှာ ကျောက်ကပ်ရောဂါနဲ့ကွယ်လွန်သွားတယ်လို့ ကွယ်လွန်သူမာရဇ္ဇရဲ့မိသားစုဝင် တစ်ယောက်က One News ကို အတည်ပြု ပြောပါတယ်။
ကွယ်လွန်သွားပြီဖြစ်တဲ့ နိုင်ငံကျော် အဆိုတော် မာရဇ္ဇရဲ့နာရေးအခမ်းအနားကိုတော့ ဇန်နဝါရီ(၂၅)ရက် နေ့လယ်(၂)နာရီကနေ(၃)နာရီခွဲအချိန်အထိ ရေဝေး သုသာန်မှာ ပြုလုပ်သွားမှာဖြစ်တယ်လို့ ဆိုပါတယ်။အဆိုတော်မာရဇ္ဇဟာ ကွယ်လွန်ချိန်မှာ အသက်(၅၈)နှစ်ရှိပြီဖြစ်ပါတယ်။ အဆိုတော်မာရဇ္ဇ ကွယ်လွန်သွားတဲ့ အပေါ် ဂီတလေကသားတွေကလည်း ဝမ်းနည်းကြောင်း လူမှုကွန်ရက်ကတစ်ဆင့် ပြောကြားထားတာကို တွေ့ရပါတယ်။
အဆိုတော် မာရဇ္ဇဟာ တေးသီချင်းကောင်း များစွာကို သီဆိုအောင်မြင်ခဲ့ပြီး ပရိသတ်အခိုင်အမာ ရရှိထားသလို ကိုယ်ပိုင်သံစဉ်တေးသီချင်းတွေကို မြတ်နိုးတန်ဖိုးထားသူ တစ်ယောက်လည်း ဖြစ်ပါတယ်။ အဆိုတော် မာရဇ္ဇရဲ့ မျှော်လင့်ခြင်းလမင်း၊ ဆွဲအား၊ ဟင်္သာတို့ရဲ့ နန်းတော်ရှေ့၊ အိပ်ရေးပျက်၊ ဝေးဝေးကလွမ်း၊ အလွမ်းမိတ်ဆွေ၊ ရွှေရောင်ကောင်းကင် စတဲ့ သီချင်းတွေဟာ လူငယ်တွေအကြား စွဲလမ်းခဲ့ရတဲ့ သီချင်းတွေ ဖြစ်ပါတယ်။
