မန္တလေးငလျင်ကြီးကြောင့် ထိခိုက်ပျက်စီးခဲ့တဲ့ အဆောက်အဦတွေကို ရုရှားနိုင်ငံက ပညာရှင်တွေ လာရောက်ပြီး တိုင်းတာစစ်ဆေးတာတွေ လုပ်ဆောင်သွားဖို့ ရှိတယ်လို့ မြန်မာနိုင်ငံဆိုင်ရာ ရုရှားသံအမတ်ကြီး H.E. Mr. Iskander Azizov (မစ္စတာ အစ်စကန်ဒါ အာဇီဇော့)က One News ကို ပြောပါတယ်။နေပြည်တော်၊ မန္တလေးနဲ့ စစ်ကိုင်း ဧရိယာတွေမှာ ငလျင်ကြောင့် ထိခိုက်ပျက်စီးခဲ့တဲ့ အဆောက်အဦတွေကို ဆန်းစစ်တိုင်းတာတာတွေလုပ်ဆောင်မယ့် နိုင်ငံတကာအဖွဲ့အစည်းတွေနဲ့အတူ ပါဝင်ဆောင်ရွက်မှာဖြစ်တယ်လို့ ဆိုပါတယ်။
ဒါ့အပြင် ရုရှားနိုင်ငံ သိပ္ပံအကယ်ဒမီပညာရှင်တွေကလည်း မြန်မာနိုင်ငံအတွင်းမှာရှိတဲ့ နိုင်ငံတကာ အသိအမှတ်ပြု ရှေးဟောင်းအမွေအနှစ်အဆောက်အဦတွေရဲ့ ထိခိုက်ပျက်စီးမှုအခြေအနေတွေကို စစ်ဆေးပေးသွားမယ်လို့ သိရပါ တယ်။ အထူးသဖြင့် ရန်ကုန်မှာရှိတဲ့ ရွှေတိဂုံစေတီတော်၊ ဆူးလေစေတီတော် အပါအဝင် ဘုရားစေတီတချို့နဲ့ ရှေး ဟောင်းအမွေအနှစ် အဆောက်အဦတွေရဲ့အခြေအနေကို စစ်ဆေးသွားမယ်လို့ ရုရှားသံအမတ်ကြီးက ပြောပါတယ်။
ပြီးခဲ့တဲ့မတ်လ ၂၈ ရက်က ဖြစ်ပွားခဲ့တဲ့ မန္တလေးငလျင်ကြီးကြောင့် လူပေါင်း ၃၀၀၀ ကျော် သေဆုံးပြီး ဘုရား၊ စေတီ၊ သာသနိက အဆောက်အအုံတွေနဲ့ လူနေအိမ်အဆောက်အအုံတွေ ပျက်စီးဆုံးရှုံးခဲ့ပါတယ်။ ရှရှားအပါအဝင် နိုင်ငံတကာ အဖွဲ့အစည်းတွေက ရှာဖွေကယ်ဆယ်ရေးလုပ်ငန်းတွေမှာ ပါဝင်ကူညီခဲ့ကြသလို လူသားချင်းစာနာထောက်ထားမှုဆိုင်ရာ အထောက်အပံ့ပစ္စည်းတွေကိုလည်း ဆက်လက်လှူဒါန်းနေကြပါတယ်။
