မန္တလေးတိုင်းဒေသကြီး၊ သာစည်မြို့နယ်မှာ ငွေကျပ် ၂ ဘီလီယံကျော်တန်ဖိုးရှိ မူးယစ်ဆေးဝါးတွေ ဖမ်းဆီးရမိ ခဲ့တယ်လို့ မြန်မာနိုင်ငံရဲတပ်ဖွဲ့က သိရပါတယ်။
လုံခြုံရေး တပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ ဇန်နဝါရီ ၂၄ ရက်၊ ည ၁၁ နာရီအချိန်လောက်က မန္တလေးတိုင်းဒေသကြီး၊ သာစည်မြို့နယ်၊ ကျွဲတပ်ဆုံ ကျေးရွာအနီးမှာ မူဆယ် ကနေ ရန်ကုန်မြို့ကို အမျိုးသားတစ်ယောက် မောင်းနှင်လာတဲ့ ကုန်တင်ယာဉ်ကို သတင်းအရ ရှာဖွေခဲ့တယ်လို့ ဆိုပါတယ်၊၊
အဲဒီလိုရှာဖွေရာ ယာဉ်ရဲ့ကိုယ်ထည်အတွင်းမှာ အံဝှက်သယ်ဆောင်လာတဲ့ ကာလတန်ဖိုးငွေ ကျပ် ၂ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြား ၁၃ ဒသမ ၈ သိန်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
စစ်ဆေးဖော်ထုတ်ချက်အရ ဖမ်းဆီးရမိတဲ့ စိတ်ကြွရူးသွပ်ဆေးပြားတွေကို ရှမ်းပြည်နယ်(မြောက်ပိုင်း)ကနေ ရန်ကုန်တိုင်းဒေသကြီးကို သယ်ဆောင်ရောင်းဝယ်မှာ ဖြစ်တယ်လို့ ဆိုပါတယ်၊၊
ဖမ်းဆီးရမိသူကိုတော့ မူးယစ် ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားပြီး ကွင်းဆက်ပြစ်မှု ကျူးလွန် သူတွေကို ဆက်လက်စစ်ဆေး ဖော်ထုတ်နေတယ်လို့ သိရပါတယ်၊၊
