လာမယ့် ၂၀၂၆ နှစ်ကုန်မှာ အမေရိကန်ကို ရောင်းမယ့် iPhone တွေကို တရုတ်ကနေ အိန္ဒိယမှာ ပြောင်းရွှေ့ထုတ် ဖို့ စီစဉ်နေပြီဖြစ်ကြောင်း Apple က ကြောညာလာတာကို Reuters သတင်းမှာ ဖော်ပြထားပါတယ်။ သမ္မတထရမ့် ရဲ့ တရုတ်ပေါ် အခွန်တိုးကောက်လာတဲ့ စရိတ်တွေ ကာမိအောင် အိန္ဒိယမှာ အခုလို ပြောင်းထုတ်ဖို့ စီစဉ်ရတာ ဖြစ်တယ်လို့ ကုမ္ပဏီတာဝန်ရှိသူ အကြီးအကဲတစ်ယောက်က ပြောပါတယ်။
ထရမ့်ခြိမ်းခြောက်လာတဲ့အခွန်ကောက်ခံမှုတွေနဲ့ ပထဝီဝင်တင်းမာတဲ့အခြေအနေတွေကို တစ်စိတ်တစ်ပိုင်း ရှောင်ရှားတဲ့အနေနဲ့ Apple က အမေရိကန်ကို ရောင်းမယ့် iPhone တွေကို အိန္ဒိယမှာနှစ်စဉ် အလုံးရေ သန်း ၆၀ အထိ ထုတ်လုပ်ဖို့ ရည်မှန်းထားတာ ဖြစ်ပါတယ်။iPhone တွေကို တရုတ်ကနေ အိန္ဒိယမှာ ပြောင်းရွှေ့ထုတ်လုပ်ပေမယ့် တရုတ်နိုင်ငံမှာ ဈေးကွက်လွှမ်းမိုးထားနိုင်မှု ကျဆင်းမသွားအောင် ထိန်းထားမယ့်အပြင် နောက်ထုတ်လုပ်မယ့် iPhone အသစ်တွေမှာ နည်းပညာပိုင်းဆိုင်ရာ ကို အဘက်ဘက်ကနေ သာလွန်ကောင်းမွန်အောင် ထုတ်လုပ်သွားမှာ ဖြစ်တယ်လို့ ဆိုပါတယ်။
အမေရိကန်မှာ ရောင်းချနေတဲ့ iPhone အလုံးရေ သန်း ၆၀ မှာ ၈၀ ရာခိုင်နှုန်းလောက်က တရုတ်က ထုတ်လုပ် ပေးနေတာဖြစ်ပြီး ဖုန်းတစ်လုံးဖြစ်ဖို့လိုအပ်တဲ့ အစိတ်အပိုင်းတွေကို တရုတ်က တာဝန်ယူပြီး အဓိက ထုတ်လုပ် နေတာဖြစ်ပါတယ်။ တရုတ်နိုင်ငံမှာ iPhone နဲ့ iPad တွေ ထုတ်တာက အိန္ဒိယထက် ပိုအကုန်အကျ သက်သာ တယ်လို့ သိရပါတယ်။
