ယူကျူ့ဟာ လူငယ်တွေကို မသင့်လျော်တဲ့အကြောင်းအရာတွေကနေ ကာကွယ်ပေးဖို့ဖိအားတွေ တိုးလာတဲ့အတွက် အရွယ်ရောက်ပြီးသူအဖြစ် ဟန်ဆောင်ထားတဲ့ ကလေးတွေယူကျူ့ပလက်ဖောင်းပေါ်မှာ ရှိ မရှိ ဆုံးဖြတ်ဖို့ အတွက် အေအိုင်ကို စတင်အသုံးပြုတော့မယ့်အကြောင်းThe Straits Times သတင်းမှာဖော်ပြပါရှိပါတယ်။
အမေရိကန်နိုင်ငံမှာစတင်အကောင်အထည်ဖော်နေတဲ့ ဒီအစီအမံအသစ်ဟာ YouTube၊ Instagram နဲ့ Tik Tok လိုမျိုး ဆိုရှယ်မီဒီယာပလက်ဖောင်းတွေမှာ လူကြီးတွေအတွက် ရည်ရွယ်တဲ့အကြောင်းအရာတွေကို ကလေးသူငယ်တွေ ကြည့်ရှုမိခြင်းကနေ ကာကွယ်ပေးဖို့ဖြစ်ပါတယ်။Machine learning လို့ခေါ်တဲ့ အေအိုင်အမျိုးအစားဟာ သုံးစွဲသူတွေရဲ့ဗီဒီယိုကြည့်ရှုမှုမှတ်တမ်းနဲ့ အကောင့်သက်တမ်းစတဲ့ အချက်တွေအပေါ် အခြေခံပြီးတော့အသက်အရွယ်ကို ခန့်မှန်းသွားမှာဖြစ်ပါတယ်။ ယူကျူ့သုံးစွဲသူဟာ ငယ်ရွယ်သူတွေလို့ ယူဆပါက အကြွေးဝယ်ကတ်၊ ဆယ်လ်ဖီ၊ သက်သေခံကတ် အစရှိတဲ့ အသက်ကိုသိနိုင်မယ့်အချက်အလက်တွေကို တောင်းဆိုသွားမယ်လို့လည်းသိရပါတယ်။
အခုအခါ ဆိုရှယ်မီဒီယာဟာ ကလေးတွေရဲ့ကောင်းကျိုးကို စောင့်ရှောက်ကာကွယ်နိုင်စွမ်းမရှိဘူးလို့စွပ်စွဲခံနေရတာဖြစ်ပါတယ်။ ဩစတြေးလျနိုင်ငံမှာဆိုရင် အသက် ၁၆ နှစ်အောက်ကလေးငယ်တွေကို ယူကျူ့ကြည့်ခြင်းတားမြစ်တဲ့ ဥပဒေပြဋ္ဌာန်းတာဟာ ဒီဇင်ဘာလ ၁၀ရက်ကစပြီး အသက်ဝင်တော့မယ်လို့သိရပါတယ်။ဩစတြေးလျနိုင်ငံက ကလေး ၁၀ ယောက်မှာ ၄ ယောက်လောက်က ယူကျူ့က အန္တရာယ်ရှိတဲ့အကြောင်းအရာတွေကိုကြည့်မိနေတယ်လို့ ဩစတြေးလျဆက်သွယ်ရေးဝန်ကြီး အန်နီကာဝဲလ်စ်က ပြောထားပါတယ်။
