ဂူးဂဲလ်ရဲ့ အမှုဆောင်အရာရှိချုပ်ဟောင်းက ဉာဏ်ရည်တု AI နည်းပညာကို အိုစမာဘင်လာဒင်လို အကြမ်းဖက် သမားတွေနဲ့ ဆိုးသွမ်းအစိုးရတွေက အပြစ်မဲ့တဲ့ ပြည်သူတွေအပေါ်မှာ အသုံးပြုလာမဲ့အရေး စိုးရိမ်ပူပန်မိကြောင်း ပြောပါတယ်။ ဂူဂဲလ်ရဲ့ အမှုဆောင်အရာရှိချုပ်ဟောင်း အဲရစ် ရှမစ်က မြောက်ကိုရီးယား၊ အီရန် ဒါမှမဟုတ် ရုရှား ဒီနိုင်ငံတွေက AI ကို ဇီ၀လက်နက်တွေ တီထွင်ရာမှာ အသုံးချလာနိုင်ကြောင်း ရှမစ် က ဘီဘီစီနဲ့ အင်တာဗျူး တစ်ခုမှာ ဗုဒ္ဓဟူးနေ့က သတိပေးလိုက်ပါတယ်။
ဒီအတွက် အစိုးရတွေအနေနဲ့ AI နည်းပညာကို ဖွံ့ဖြိုးအောင် တီထွင်ထုတ်လုပ်နေတဲ့ ပုဂ္ဂလိက နည်းပညာကုမ္ပဏီတွေအပေါ်မှာ ကြီးကြပ်ထိန်းကျောင်းမှုတွေ လုပ်ဖို့ တောင်းဆို လိုက်ပါတယ်။ တစ်ဖက်မှာလည်း အလွန်အကျွံ ကြီးကြပ်ထိန်းချုပ်မှုက တီထွင်ဖန်တီးမှုကို တုံ့ဆိုင်းသွားစေမယ် လို့လည်း သတိပေးလိုက်ပြန်ပါတယ်။ရှမစ်က အဆင့်မြင့် AI စနစ်မှာ အသုံးပြုတဲ့ အရေးကြီး မိုက်ခရိုချစ်(ပ်)ပြားတွေကို ပြည်ပတင်ပို့မှု ထိန်းချုပ် ကန့်သတ်တာကို လက်ခံသဘောတူတယ်လို့ ပြောပါတယ်။
အဲရစ်ရှမစ်က ပြင်သစ်နိုင်ငံ ပဲရစ်မြို့တော်မှာ ကျင်းပတဲ့ AI Action ထိပ်သီးညီလာခံအတွင်း ဘီဘီစီနဲ့ အင်တာဗျူးမှာ အခုလို ပြောကြားသွားတာပါ။ အဲဒီ ထိပ်သီးညီလာခံမှာ အမေရိကန်နဲ့ ဗြိတိန်တို့က ညီလာခံ သဘောတူညီချက်ကို လက်မှတ်ရေးထိုးဖို့ ငြင်းဆန်ခဲ့ ကြပါတယ်။ အမေရိကန် ဒုတိယသမ္မတ ဂျေဒီဗန့်စ်က စည်းမျဉ်းစည်းကမ်းတွေ ချမှတ်တာက ပြောင်းလဲတိုးတက် လာနေတဲ့လုပ်ငန်းကို သေသွားစေလိမ့်လို့ အကြောင်းပြချက် ပေးထားပါတယ်။
