ခြံအမှတ် ၅၄ ကို ကျပ်ဘီလီယံ ၂၇၀ ဖြင့် ဧပြီ ၂၉ ရက်တွင် လေလံတင် ရောင်းချမည်

ရန်ကုန်မြို့ ၊ ဗဟန်းမြို့နယ်၊ တက္ကသိုလ်ရိပ်သာလမ်းက နေအိမ်ခြံအမှတ် ၅၄ ကို ကျပ်ဘီလီယံ ၂၇၀ နဲ့ စတုတ္ထအကြိမ် လေလံတင် ရောင်းချတာကို ဧပြီ ၂၉ ရက်မှာ ပြုလုပ်သွားဖို့ ကမာရွတ်ခရိုင်တရားရုံးက ဆုံးဖြတ်ခဲ့တယ်လို့ ဦးအောင်ဆန်းဦးရဲ့ ရှေ့နေက One News ကို ပြောပါတယ်။

ခြံအမှတ် ၅၄ ကို တတိယအကြိမ် လေလံကြမ်းခင်းဈေး ကျပ် ၂၉၇ ဘီလီယံကနေ ကျပ် ဘီလီယံ ၂၇၀ နဲ့ ရောင်းချဖို့ ဦးအောင်ဆန်းဦးဘက်က တင်ပြခဲ့ပေမယ့် ဒေါ်အောင်ဆန်းစုကြည်ဘက်က လေလံကြမ်းခင်းဈေး အတိအကျ တင်ပြထားတာ မရှိတဲ့အတွက် တရားရုံးများလက်စွဲ အပိုဒ် ၂၃၈ အရ ဦးအောင်ဆန်းဦး ဘက်က တင်ပြတဲ့ လေလံ ကြမ်းခင်းဈေးနဲ့ ရောင်းချဖို့ မတ်လ ၂၅ ရက်က ကမာရွတ်ခရိုင်တရားရုံးက ဆုံးဖြတ်ခဲ့တာပါ။နေအိမ်ခြံအမှတ် ၅၄ ကို ကျပ်ဘီလီယံ ၂၇၀ နဲ့ စတုတ္ထအကြိမ် လေလံတင် ရောင်းချတာကိုတော့ လာမယ့် ဧပြီ ၂၉ ရက်မှာ နေအိမ်ခြံဝင်းရှေ့မှာပဲ ပြုလုပ်သွားမှာ ဖြစ်ပြီး ဧပြီ ၃၀ ရက်နေ့မှာတော့ တရားရုံးကို အစီရင်ခံစာ ပြန်သွင်းရမှာ ဖြစ်တယ်လို့ ဦးအောင်ဆန်းဦးရဲ့ ရှေ့နေက ပြောပါတယ်။

ခြံအမှတ် ၅၄ ကို ပြီးခဲ့တဲ့ ၂၀၂၄ ခုနှစ် မတ်လ ၂၀ ရက်က ကျပ် ၃၁၅ ဘီလီယံ နဲ့ ပထမအကြိမ်၊ ၂၀၂၄ ခုနှစ် ဩဂုတ် ၁၅ ရက်က ကျပ်ဘီလီယံ ၃၀၀ နဲ့ ဒုတိယအကြိမ် နဲ့ ၂၀၂၅ ခုနှစ် ဖေဖော်ဝါရီ ၅ ရက်က ကျပ် ၂၉၇ ဘီလီယံ နဲ့ တတိယအကြိမ် လေလံတင်ရောင်းချခဲ့ပေမယ့် လက်ရှိအချိန်ထိ ဝယ်ယူသူ တစ်ယောက်မှ မရှိသေးတာကို တွေ့ရပါ တယ်။မြန်မာ့လွတ်လပ်ရေးခေါင်းဆောင် ဗိုလ်ချုပ် အောင်ဆန်းရဲ့ ဇနီးဖြစ်သူ ဒေါ်ခင်ကြည် အမည်ပေါက်နဲ့ ကျန်ရစ်တဲ့ အမွေပစ္စည်းတွေ ဖြစ်တဲ့ ခြံအမှတ် ၅၄ ဟာ ဧရိယာအနေနဲ့ ၁ ဒသမ ၉၂၃ ဧကရှိ မြေကွက်ကြီး နဲ့ မြေပေါ်ရှိ အဆောက်အဦတွေ ပါဝင်တယ်လို့လည်း သိရပါတယ်။