လာမည့်ဘဏ္ဍာနှစ်၌ GDP ဒေါ်လာ ၈၁ ဘီလီယံရရန် မျှော်မှန်း

လာမယ့် ၂၀၂၅-၂၀၂၆ ဘဏ္ဍာနှစ်မှာ နိုင်ငံ့ GDP ကို အမေရိကန်ဒေါ်လာ ၈၁ ဘီလီယံရရှိအောင် မျှော်မှန်းပြီး လုပ်ဆောင်နေတယ်လို့ နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောပါတယ်။မတ်လ ၂၁ ရက်က နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၁ မှာ ကျင်းပတဲ့ “၂၀၂၅ အလွန် ဗဟုဝင်ရိုးကမ္ဘာတွင် မြန်မာနိုင်ငံ ကြုံတွေ့လာရမည့် စိန်ခေါ်မှုများနှင့် အခွင့်အလမ်းများ သုံးသပ် ဆွေးနွေးပွဲ” ဖွင့်ပွဲအခမ်းအနားမှာ ဗိုလ်ချုပ်မှူးကြီး မင်းအောင်လှိုင်က အခုလို ပြောကြားလိုက်တာပါ။

မြန်မာနိုင်ငံရဲ့ လက်ရှိ GDP ဟာ အမေရိကန်ဒေါ်လာ ၆၀ နဲ့ ၇၀ ဘီလီယံကြားမှာရှိပြီး လာမယ့်ဘဏ္ဍာနှစ်မှာ ၈၁ ဘီလီယံလောက် ရရှိအောင်မျှော်မှန်းပြီး လုပ်ဆောင်နေတယ်လို့ ဗိုလ်ချုပ်မှူးကြီး မင်းအောင်လှိုင်က ပြောပါတယ်။ မြန်မာနိုင်ငံရဲ့ GDP ဟာ အိမ်နီးချင်း ထိုင်း၊ ဘင်္ဂလားဒေ့ရှ်နိုင်ငံတွေနဲ့ နှိုင်းယှဉ်ကြည့်မယ်ဆိုရင် နည်းနေတာကို တွေ့ရမှာဖြစ်ပြီး လယ်ယာကဏ္ဍကြီး တစ်ခုတည်းကို ကြည့်မယ်ဆိုရင်တောင် နည်းနေသေးတာကို တွေ့ရတယ်လို့ ဆိုပါတယ်။

မြန်မာနိုင်ငံမှာ စပါးစိုက်ဧက ၁၅ သန်းဝန်းကျင်ရှိပြီး အဲဒီစိုက်ဧကတွေမှာ သီးထပ်စိုက်ပျိုးမယ်ဆိုရင် လယ်ယာ ထွက်ကုန် နှစ်ဆလောက် တိုးမြင့်လာနိုင်မှာ ဖြစ်တယ်လို့ ဗိုလ်ချုပ်မှူးကြီး မင်းအောင်လှိုင်က ပြောပါတယ်။ ဒါ့အပြင် ဝါနဲ့ ရာဘာစိုက်ပျိုးမှုတွေကတစ်ဆင့် အဝတ်အထည်တွေ၊ ဖိနပ်တွေ ထုတ်လုပ်နိုင်မယ်ဆိုရင် မြန်မာ တစ်နိုင်ငံတည်းကိုသာမက အိမ်နီးချင်းနိုင်ငံတွေကိုပါ တင်ပို့နိုင်မှာဖြစ်တယ်လို့ ဆိုပါတယ်။ မြန်မာနိုင်ငံအပေါ် စီးပွားရေးပိတ်ဆို့မှုတွေ ရှိနေတာကြောင့် အခက်အခဲတချို့ ရှိနေပေမယ့်လည်း ဖြေရှင်းလို့ ရတယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ပါတယ်။