အနာဂတ်ရေဖူလုံရေးအတွက် ရေစီမံအုပ်ချုပ်ရေးလုပ်ငန်းတွေဟာ အလွန်အရေးကြီးတယ်လို့ နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောပါတယ်။မတ်လ၂၂ရက်ကကျင်းပတဲ့ ကမ္ဘာ့ရေနေ့ ၂၀၂၅ အခမ်းအနားမှာ အမျိုးသားအဆင့် ရေအရင်းအမြစ်ကော်မတီဥက္ကဋ္ဌလည်းဖြစ်တဲ့ ဗိုလ်ချုပ်မှူးကြီးမင်းအောင်လှိုင်က အခုလိုပြောကြားလိုက်တာပါ။
လက်ရှိအနေအထားမှာ ဧရာဝတီမြစ်၊ ချင်းတွင်းမြစ်တို့ဟာ လူတွေရဲ့လုပ်ဆောင်ချက်ကြောင့် သောင်ပို့မှုတွေများပြားလာပြီး ရေကြောင်းသွားလာရေးမှာ ကန့်သတ်ချက်တွေများလာတယ်လို့ဆိုပါတယ်။အဲ့ဒါကြောင့် မြစ်ကြောင်းတွေထိန်းသိမ်းရေးဟာ အရေးကြီးတဲ့အခြေအနေရှိနေပြီး စောလျင်စွာ ဖြေရှင်းဖို့လိုတယ်လို့ ပြောပါတယ်။အဓိကမြစ်တွေနဲ့ အဲဒီမြစ်တွေထဲကိုစီးဝင်တဲ့ မြစ်၊ ချောင်းတွေရဲ့ ဘေးဝဲယာမှာ သဘာဝပတ်ဝန်းကျင်ထိခိုက်စေတဲ့ လုပ်ငန်းတွေကို ဒေသဆိုင်ရာအစိုးရ၊ အုပ်ချုပ်ရေးအဖွဲ့တွေက ကြပ်မတ်ဖို့လိုတယ်လို့ ဆိုပါတယ်။
ရေရှည်တည်တံ့တဲ့ ရေစီမံခန့်ခွဲမှု အလေ့အကျင့်ကောင်းတွေရရှိစေရေး လူတိုင်းကို အသိပညာပေးတာအပြင် နည်းပညာအသစ်တွေတီထွင်ကြံဆတာ၊ ရေအသုံးပြုမှုဆိုင်ရာ အလေ့အကျင့်ကောင်းတွေဖော်ထုတ်တာ စတဲ့နည်းစနစ်အသစ်တွေကို ကျင့်သုံးသွားရမှာဖြစ်တယ်လို့ ဗိုလ်ချုပ်မှူးကြီးမင်းအောင်လှိုင်က ပြောပါတယ်။
