ပါတီတွေမှတ်ပုံတင်တာနဲ့ပတ်သက်လို့ ဥပဒေရဲ့အထက်မှာ ဘယ်သူမှမရှိတဲ့အတွက် ဥပဒေအတိုင်းသာ ဆောင် ရွက်သင့်တယ်လို့ နိုင်ငံတော်စီမံအုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းကပြောပါတယ်။မတ်လ(၂၅)ရက် မနက်ပိုင်းက နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမှာ ပြုလုပ်တဲ့ နိုင်ငံတော်စီမံအုပ်ချုပ်ရေးကောင်စီအစည်းအဝေးမှာ အခုလို ထည့်သွင်းပြောကြားခဲ့တာပါ။
ဒါ့အပြင် ရွေးကောက်ပွဲမှာ မဲဆန္ဒရှင်စာရင်းတွေမှန်ကန်မှုရှိစေရေး ကြိုတင်ပြင်ဆင်စိစစ်ဆောင်ရွက်ဖို့လိုအပ်မှု အခြေအနေတွေ၊ ရွေးကောက်ပွဲမှာ ပါဝင်ယှဉ်ပြိုင်ကြမယ့် ပါတီတွေအနေနဲ့ ဥပဒေနဲ့အညီ ဝင်ရောက်ယှဉ်ပြိုင် နိုင်မှုအခြေအနေတွေ၊ နိုင်ငံတော်စီမံအုပ်ချုပ်ရေးကောင်စီအနေနဲ့ နိုင်ငံတိုးတက်ကောင်းမွန်စေရေး ကြိုးပမ်း ဆောင်ရွက်နေတဲ့ အခြေအနေတွေနဲ့ ပြည်သူ့စစ်မှုထမ်းခေါ်ယူမှုတွေကိုလည်း ဥပဒေနဲ့အညီဆောင်ရွက်သွားဖို့ လိုအပ်တဲ့ အခြေအနေတွေကို ဒုတိယဗိုလ်ချုပ်မှူးကြီး စိုးဝင်းက ရှင်းလင်းပြောကြားခဲ့ပါတယ်။
