နိုင်ငံတွေဟာ အင်အားကြီး စူပါပါဝါနိုင်ငံတစ်နိုင်ငံတည်းအပေါ်မှီခိုမှုကို လျှော့ချပြီး မိမိတို့ရဲ့ မိတ်ဖက်တွေကို တိုးချဲ့ဆက်ဆံကြရမှာဖြစ်တယ်လို့ နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောပါ တယ်။ မတ်လ၂၁ ရက်က နေပြည်တော်ရှိ MICC-1 မှာကျင်းပတဲ့ “၂၀၂၅ အလွန် ဗဟုဝင်ရိုးကမ္ဘာတွင် မြန်မာနိုင်ငံ ကြုံတွေ့လာရမည့် စိန်ခေါ်မှုများနှင့် အခွင့်အလမ်းများ သုံးသပ်ဆွေးနွေးပွဲ” ဖွင့်ပွဲအခမ်းအနားမှာ ဗိုလ်ချုပ်မှူးကြီး မင်းအောင်လှိုင်က အခုလို ပြောကြားလိုက်တာပါ။
အဲဒီလိုဆောင်ရွက်နိုင်မှသာ ဆုံးဖြတ်ချက်တွေ ချမှတ်ရာမှာ ပြောင်းလွယ်ပြင်လွယ်ဖြစ်စေပြီး မလိုတဲ့ ဖိအားတွေကို လည်း မိတ်ဖက်နိုင်ငံတွေရဲ့ပေါင်းစည်းအားနဲ့ ကြံ့ကြံ့ခံနိုင်မှာဖြစ်တယ်လို့ ဗိုလ်ချုပ်မှူးကြီးမင်းအောင်လှိုင်က ပြောပါတယ်။ နိုင်ငံတကာဆက်ဆံရေးမှာ အင်အားကြီးနိုင်ငံတွေရဲ့ လွှမ်းမိုးမှုပုံစံတွေလည်း ပြောင်းလဲလာတာကို တွေ့ရှိရမှာ ဖြစ်သလို ဒေသတွင်းအဖွဲ့အစည်းတွေရဲ့ အခန်းကဏ္ဍဟာလည်း ပိုမိုအရေးပါလာတာကို တွေ့ရမှာဖြစ်တယ်လို့ ဆိုပါတယ်။
ဒီဆွေးနွေးပွဲမှာ ပါဝင်ဆွေးနွေးကြမယ့် ပြည်တွင်း၊ ပြည်ပကပညာရှင်တွေရဲ့ ဆွေးနွေးအကြံပြုချက်တွေဟာ ၂၀၂၅ အလွန် မြန်မာနိုင်ငံကို ခေတ်မီဖွံ့ဖြိုးတိုးတက်တဲ့နိုင်ငံအဖြစ် တည်ဆောက်ရာမှာ များစွာအထောက်အကူပြုနိုင်မှာ ဖြစ်တယ်လို့လည်း ဗိုလ်ချုပ်မှူးကြီးမင်းအောင်လှိုင်က ပြောပါတယ်။အခုဆွေးနွေးပွဲကို ပြန်ကြားရေးဝန်ကြီးဌာနနဲ့ မြန်မာ့ပုံရိပ်ဖော်ညွှန်းရေးအဖွဲ့တို့က ပူးပေါင်းစီစဉ်ကျင်းပတာဖြစ်ပြီး ပြည်တွင်းက နိုင်ငံရေး၊ စီးပွားရေးပညာရှင်တွေနဲ့ အိန္ဒိယ၊ တရုတ်၊ ရုရှား၊ ထိုင်း၊ နီပေါ၊ ဂျပန်၊ အီတလီ စတဲ့ နိုင်ငံတွေက ပညာရှင်တွေ ပါဝင်ဆွေးနွေးကြတာဖြစ်တယ်လို့ သိရပါတယ်။
