(၅၈)ကြိမ်မြောက် ပုံမှန်လူ့အခွင့်အရေးကောင်စီ အစည်းအဝေးကာလအတွင်း မြန်မာနိုင်ငံ လူ့အခွင့်အရေး အခြေ အနေဆိုင်ရာ အထူးအစီရင်ခံစာ တင်သွင်းသူဆိုသူရဲ့ တင်ပြမှု အကြံပြုချက်တွေနဲ့ အစီရင်ခံစာ တစ်ခုလုံးကို အစိုးရက ပြင်းထန်စွာ ပယ်ချတယ်လို့ နိုင်ငံခြားရေးဝန်ကြီးဌာနက တုံ့ပြန်ချက် ထုတ်ပြန်လိုက်ပါတယ်။ပုံမှန်လူ့အခွင့်အရေးကောင်စီ အစည်းအဝေးကာလဖြစ်တဲ့ မတ်လ ၁၉ ရက် နဲ့ ၂၀ ရက်တွေမှာ ဒုတိယအကြိမ် မြန် မာနိုင်ငံဆိုင်ရာ အပြန်အလှန် ဆွေးနွေးပွဲကို သက်ဆိုင်ရာနိုင်ငံဖြစ်တဲ့ မြန်မာနိုင်ငံကို ပါဝင်ခွင့် မပြုဘဲ မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာ တင်သွင်းသူဆိုသူ နဲ့ ကျင်းပပြုလုပ်ခဲ့တယ်လို့ ဆိုပါတယ်။
သူရဲ့ အစီရင်ခံစာမှာ ခိုင်မာတဲ့ အချက်အလက်တွေကို ရည်ရွယ်ချက်ရှိရှိ ချန်လှပ်ထားတာဟာ အစီရင်ခံစာရဲ့ ပုဂ္ဂိုလ်ရေးအမြင် လွှမ်းနေတဲ့ သဘောသဘာဝကို ပြသနေပြီး လုပ်ပိုင်ခွင့် တစ်ခုလုံးရဲ့ သမာသမတ် ကျမှုအပေါ် မေးခွန်းထုတ်ဖွယ် ဖြစ်တယ်လို့ တုံ့ပြန်ချက်မှာ ဖော်ပြထားပါတယ်။နိုင်ငံအချို့နဲ့ ကုလသမဂ္ဂရဲ့ လုပ်ပိုင်ခွင့် အပ်နှင်းခံထားရသူတွေဟာ မြန်မာနိုင်ငံမှာ ဒီမိုကရေစီ ပြန်လည်ရရှိရေး တောင်းဆိုနေကြပေမယ့် လွတ်လပ်ပြီး တရားမျှတတဲ့ ရွေးကောက်ပွဲ ကျင်းပဖို့ အစိုးရရဲ့ ကြိုးပမ်းမှုတွေကို ရှုတ်ချ နေတယ်လို့လည်း တုံ့ပြန်ထားပါတယ်။ဒီမိုကရေစီစနစ်အတွက် ရွေးကောက်ပွဲတွေ ကျင်းပတာဟာ အခြေခံကျပြီး မဖြစ်မနေ လုပ်ဆောင်ရမယ့် ကိစ္စရပ် ဖြစ်တဲ့အလျောက် အထူးအစီရင်ခံစာ တင်သွင်းသူဆိုသူရဲ့ သေချာလေ့လာဆန်းစစ်မှု မရှိဘဲ လိုရာဆွဲ ကောက်ချက် ချမှုအပေါ် မြန်မာနိုင်ငံက ပြတ်သားစွာ ပယ်ချတယ်လို့လည်း တုံ့ပြန်ချက်မှာ ပါရှိပါတယ်။မြန်မာနိုင်ငံဟာ စားနပ်ရိက္ခာဖူလုံမှုရှိတဲ့ နိုင်ငံဖြစ်ပြီး နှစ်စဉ် ပြည်ပကို ဆန်တန်ချိန် ၂ သန်းခွဲ တင်ပို့နေပြီး အနောက်နိုင်ငံအချို့ရဲ့ စီးပွားရေးပိတ်ဆို့ မှုတွေကြောင့် စားသောက်ကုန်ဈေးနှုန်းတွေ မြင့်တက်လာမှုကို ကြုံတွေ့ နေရတယ်လို့လည်း ဆိုပါတယ်။
အထူးအစီရင်ခံစာတင်သွင်းသူဆိုသူက နိုင်ငံတကာ ဥပဒေနဲ့ ကုလသမဂ္ဂ ပဋိညာဉ်စာတမ်းကို သွေဖည်ပြီး မြန်မာ နိုင်ငံအပေါ် တစ်ဖက်သတ် အကျပ်ကိုင် အရေးယူတာတွေ ပြုလုပ်ဖို့ အဖွဲ့ဝင်နိုင်ငံတွေကို ထပ်မံနှိုးဆော်ခဲ့ကာ အရေးယူဖို့ နည်းလမ်းတွေ ချမှတ်နိုင်တဲ့ ကုလသမဂ္ဂရဲ့ တစ်ခုတည်းသော အဖွဲ့အစည်းမှာ လုံခြုံရေးကောင်စီသာ ဖြစ်ရာ အခုလို လုပ်ဆောင်ချက်ဟာ လူ့အခွင့်အရေးကောင်စီရဲ့ လုပ်ပိုင်ခွင့်ထက် ကျော်လွန်နေတယ်လို့လည်း တုံ့ပြန်ချက်မှာ ဖော်ပြထားပါတယ်။ဒါ့အပြင် မြန်မာနိုင်ငံရဲ့ အချုပ်အခြာအာဏာနဲ့ နယ်မြေစိုးမိုးမှုကို ထိပါးဖို့ ကြိုးပမ်းမှု မှန်သမျှကို သည်းခံမှာ မဟုတ်ဘူးလို့ အထူးအစီရင်ခံစာ တင်သွင်းသူဆိုသူကို သတိပေးလိုက်ကြောင်းနဲ့ အထူးအစီရင်ခံစာ တင်သွင်းသူ ဆိုသူဟာ မြန်မာနိုင်ငံကို အဖွဲ့ဝင်နိုင်ငံတွေကို ဘယ်လို ဆက်ဆံသင့်တာကို အမိန့်ပေးပိုင်ခွင့် မရှိတာကြောင့် အစီရင်ခံစာ တစ်ခုလုံးကို ပြင်းထန်စွာ ပယ်ချလိုက်ပြီး မြန်မာနိုင်ငံအတွက် မျှတပြီး အပြုသဘောဆွေးနွေး ပြောကြားခဲ့တဲ့ ကိုယ်စားလှယ်အဖွဲ့တွေကို ကျေးဇူးတင်ရှိကြောင်းကိုလည်း တုံ့ပြန်ချက်မှာ ဖော်ပြထားပါတယ်။
