ပြည်ထောင်စုရွေးကောက်ပွဲကော်မရှင်နဲ့ မြန်မာနိုင်ငံ သတင်းမီဒီယာကောင်စီတို့ ပူးပေါင်းပြီး မြန်မာအီလက်ထ ရောနစ် မဲပေးစက်(MEVM)နဲ့ စပ်လျဉ်းပြီး မီဒီယာတွေကို ရှင်းလင်းပြသတာနဲ့ လက်တွေ့သရုပ်ပြ စမ်းသပ်မဲပေး တာကို ဇူလိုင် ၄ ရက် မနက်ပိုင်းက ရန်ကုန်မြို့၊ သတင်းနှင့်စာနယ်ဇင်းလုပ်ငန်း (ရွှေဥဒေါင်းခန်းမ)မှာ ပြုလုပ်ခဲ့ပါ တယ်။
အခမ်းအနား စတင်ရာမှာတော့ မြန်မာနိုင်ငံ သတင်းမီဒီယာကောင်စီဥက္ကဋ္ဌ ဒေါက်တာတင်ထွန်းဦးက နှုတ်ခွန်း ဆက်စကား ပြောကြားပါတယ်။ အဲဒီနောက် ပြည်ထောင်စုရွေးကောက်ပွဲ ကော်မရှင် အဖွဲ့ဝင် ဦးအောင်လွင်ဦးက မြန်မာအီလက်ထရောနစ် မဲပေးစက်အကြောင်း ရှင်းလင်းပြောကြားပါတယ်။ ဆက်လက်ပြီး ပြည်ထောင်စု ရွေးကောက်ပွဲကော်မရှင်၊ ဒုတိယညွှန်ကြားရေးမှူးချုပ် ဦးညီညီလွင်က မြန်မာအီလက်ထရောနစ် မဲပေးစက်ကို သရုပ်ပြ ရှင်းလင်းပြောကြားခဲ့ပါတယ်။ရွေးကောက်ပွဲအတွက် မီဒီယာလမ်းညွှန်စာအုပ်ကို ရေးသားပြုစုနေပြီး ရွေးကောက်ပွဲမကျင်းပမီ မီဒီယာတွေကို ဖြန့်ဝေပေးနိုင်ဖို့ ဆောင်ရွက်နေတယ်လို့ ဒေါက်တာတင်ထွန်းဦးက ပြောပါတယ်။
မြန်မာအီလက်ထရောနစ် မဲပေးစက်(MEVM) အသုံးပြုပုံနဲ့ ပတ်သက်ပြီး ရန်ကုန်၊ မန္တလေး၊ နေပြည်တော်၊ ပဲခူးနဲ့ ဧရာဝတီတိုင်းဒေသကြီးတွေက ပြည်သူ တစ်သိန်း တစ်သောင်းလောက်ကို လက်တွေ့စမ်းသပ် မဲပေးတာတွေ ဆောင်ရွက်ခဲ့ပြီး ဖြစ်တယ်လို့ ဒုတိယညွှန်ကြားရေးမှူးချုပ် ဦးညီညီလွင်က ပြောပါတယ်။ အဲဒီနောက်မှာတော့ မီဒီယာတွေက မြန်မာအီလက်ထရောနစ် မဲပေးစက်နဲ့ လက်တွေ့ လေ့လာစမ်းသပ် မဲပေးခဲ့ ကြပါတယ်။ ဒီနောက်မှာတော့ မြန်မာနိုင်ငံ သတင်းမီဒီယာကောင်စီ ဒုတိယဥက္ကဋ္ဌ(၂) ဦးခင်မောင်ကျော်ဒင်က ကျေးဇူးတင်စကား ပြောကြားပြီး အခမ်းအနားကို နိဂုံးချုပ်ခဲ့ပါတယ်။ အခမ်းအနားကိုတော့ ပြည်ထောင်စု ရွေးကောက်ပွဲကော်မရှင်က တာဝန်ရှိသူတွေ ၊ မြန်မာနိုင်ငံ သတင်းမီဒီယာ ကောင်စီဥက္ကဋ္ဌနဲ့ တာဝန်ရှိသူတွေ၊ သတင်းမီဒီယာတွေ တက်ရောက်ခဲ့ကြပါတယ်။
