အခုနှစ်ထဲမှာ ရွေးကောက်ပွဲလုပ်ပြီး လာမယ့် ဘဏ္ဍာနှစ်အစနဲ့တိုက်ဆိုင်ကာ ရွေးကောက်ခံအစိုးရကို အာဏာလွှဲနိုင်တယ်လို့ မှန်းဆကြောင်း ပြည်သူ့ပါတီဥက္ကဋ္ဌ ဦးကိုကိုကြီးက ပြောပါတယ်။ဇန်နဝါရီ၂၆ရက်က ပြည်သူ့ပါတီဌာနချုပ်မှာ ပြုလုပ်တဲ့ သတင်းစာရှင်းလင်းပွဲမှာ ဦးကိုကိုကြီးက အခုလိုပြောကြားလိုက်တာပါ။
“လက်ရှိတပ်မတော်အကြီးအကဲရဲ့ ကတိစကားများအရ ၂၀၂၅ထဲမှာလုပ်မယ်။ အဲ့ဒီတော့ ဒီဇင်ဘာ၃၁ရက်မတိုင်ခင်လို့ ကျွန်တော်တို့နားလည်တာပေါ့။ နောက်တစ်ခုကတော့ ကျွန်တော်တို့မှန်းဆချက်ကိုပြောရရင် ရွေးကောက်တင်မြှောက်ခံအစိုးရကို အာဏာလွှဲတယ်ဆိုတာ များသောအားဖြင့် ဘဏ္ဍာရေးနှစ်နဲ့ တိုက်ဆိုင်ပြီးလုပ်ကြရတယ်။ လက်ရှိမှာ ဘဏ္ဍာရေးနှစ်အစကို ဧပြီ၁ရက်နေ့ကို သတ်မှတ်ထားပြီးဖြစ်တော့ ဧပြီ၁ရက်နဲ့တိုက်ဆိုင်ပြီး အပြောင်းအလဲဖြစ်နိုင်ပါတယ်။ ဒါကျွန်တော့်ရဲ့မှန်းဆချက်ပါ” လို့ ဦးကိုကိုကြီးက ပြောပါတယ်။
နောက်တစ်ချက်အနေနဲ့ နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က သိက္ခာရှိတဲ့ရွေးကောက်ပွဲဖြစ်အောင်လုပ်မယ်လို့ ပြောထားတဲ့အတွက် သုံးပုံတစ်ပုံလောက်နဲ့လုပ်မှာမဟုတ်ဘဲ အဲဒီထက်ပိုပြီးလုပ်နိုင်အောင် ကြိုးပမ်းနိုင်တယ်လို့လည်း ဦးကိုကိုကြီးကပြောပါတယ်။ဗိုလ်ချုပ်မှူးကြီးမင်းအောင်လှိုင်က အခုနှစ်ထဲမှာ ရွေးကောက်ပွဲကျင်းပနိုင်ဖို့ ကြိုးပမ်းနေပြီး ရွေးကောက်ပွဲကို မဖြစ်မနေကျင်းပပေးမယ်လို့ ကတိစကားပြောကြားထားသလို ရွေးကောက်ပွဲကို ကျင်းပနိုင်တဲ့ မဲဆန္ဒနယ်တွေမှာ အရင်ကျင်းပပြီး ကျန်တဲ့မဲဆန္ဒနယ်တွေမှာ အပိုင်းလိုက် ရွေးကောက်ပွဲကျင်းပနိုင်တယ်လို့လည်း ပြောကြားထားဖူးပါတယ်။
ဖွဲ့စည်းပုံအခြေခံဥပဒေ(၂၀၀၈ခုနှစ်)ပုဒ်မ ၁၂၈(က)မှာ ပြည်သူ့လွှတ်တော်အစည်းအဝေးတစ်ရပ်ရဲ့ ပထမနေ့မှာ တက်ရောက်ခွင့်ရှိတဲ့လွှတ်တော်ကိုယ်စားလှယ်အရေအတွက်ရဲ့ ထက်ဝက်ကျော်တက်ရောက်ရင် လွှတ်တော်အစည်းအဝေးအထမြောက်ပြီး တကယ်လို့ အထမမြောက်ရင် အစည်းအဝေးကို ရွှေ့ဆိုင်းရမယ်လို့ပြဋ္ဌာန်းထားပါတယ်။
