လာမယ့် ဒီဇင်ဘာလအတွင်း ပါတီစုံ ဒီမိုကရေစီ အထွေထွေရွေးကောက်ပွဲ ကျင်းပနိုင်ရေးအတွက် တိုင်းဒေသကြီး နဲ့ပြည်နယ်တွေအလိုက် လုံခြုံရေးလုပ်ငန်းတွေကို စနစ်တကျ ဆောင်ရွက်ကြဖို့လိုတယ်လို့ နစကဥက္ကဋ္ဌ နိုင်ငံတော် ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောပါတယ်။မတ်လ ၂၄ ရက်က ကျင်းပတဲ့ အမျိုးသားစီမံကိန်းကော်မရှင်အစည်းအဝေးမှာ ကော်မရှင်ဥက္ကဋ္ဌအဖြစ် တာဝန်ယူ ထားတဲ့ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တာပါ။
နိုင်ငံတော်အနေနဲ့ ဖွံ့ဖြိုးတိုးတက်ရေးနဲ့ စီးပွားရေး အားကောင်းစေဖို့ တွန်းအားပေး ဆောင်ရွက်နေပေမယ့် အဖျက် အမှောင့် လုပ်ငန်းတွေကြောင့် နိုင်ငံတော်ရဲ့ စီးပွားရေးနဲ့ လူမှုရေးဆိုင်ရာ အခြေခံအဆောက်အအုံတွေဖြစ်တဲ့ လမ်း၊ တံတား၊ တာဝါတိုင်၊ လျှပ်စစ်ဓာတ်အားပေးစက်ရုံ၊ ကျောင်း၊ ဆေးရုံ စတာတွေ ပျက်စီးဆုံးရှုံးမှုတွေ ရှိနေ တယ်လို့ ဆိုပါတယ်။အဲဒီလို ဖျက်ဆီးမှုတွေကြောင့် သမင်မွေးရင်း ကျားစားရင်းဆိုတဲ့ စကားအတိုင်း နိုင်ငံတော်ဖွံ့ဖြိုးတိုးတက်ရေး အတွက် ဆောင်ရွက်ရာမှာ တိုးတက်မှုကို အဟန့်အတားဖြစ်စေပြီး နယ်မြေဒေသမတည်ငြိမ်တဲ့ ဒေသတွေမှာ ဖွံ့ဖြိုးမှုလုပ်ငန်းတွေ မဆောင်ရွက်နိုင်တဲ့အတွက် နောက်ကျကျန်နေတာကိုတွေ့ရမှာဖြစ်တယ်လို့လည်း ဗိုလ် ချုပ်မှူးကြီး မင်းအောင်လှိုင်က ပြောပါတယ်။
လုံခြုံရေးစနစ်ကောင်းမွန်လာရင် ပြည်တွင်းပြည်ပ ရင်းနှီးမြှုပ်နှံမှုတွေကလည်း တိုးတက်လာမှာဖြစ်ပြီး အမျိုး သားစီမံကိန်းတွေ အောင်မြင်စေရေးအတွက် အားလုံးက ဝိုင်းဝန်းကြိုးပမ်းဆောင်ရွက်ကြစေလိုတယ်လို့ ပြောပါ တယ်။ ဒါ့အပြင် နိုင်ငံတစ်နိုင်ငံရဲ့ စီးပွားရေးအင်အား ကောင်းမွန်ဖို့အတွက် ဂျီဒီပီကို ရည်မှန်းထားတဲ့အတိုင်းရရှိဖို့ ကြိုးပမ်းရမှာဖြစ်ပြီး အမျိုးသားစီမံကိန်းနဲ့ ဒေသန္တရ စီမံကိန်းတွေမှာ ရည်မှန်းထားတဲ့ ရလဒ်တွေ ရရှိစေရေး လက်တွေ့ကျကျ ဆောင်ရွက်သွားဖို့ လိုတယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ပါတယ်။
