မြန်မာ့ရိုးရာ နှစ်သစ်ကူးအတာသင်္ကြန်ပွဲတော်ကို ကမ္ဘာ့ဒြပ်မဲ့ယဉ်ကျေးမှုအမွေအနှစ် စာရင်းအဖြစ် သတ်မှတ်ခံရ တယ်လို့ သာသနာရေးနှင့်ယဉ်ကျေးမှုဝန်ကြီးဌာနက ထုတ်ပြန်ပါတယ်။
မြန်မာ့သင်္ကြန်ပွဲတော်ကို ယူနက်စကိုရဲ့ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှု အမွေအနှစ်စာရင်းမှာ ပါဝင်နိုင်ဖို့အတွက် ဆောင်ရွက်ခဲ့ရာ မြန်မာ့ရိုးရာ နှစ်သစ်ကူးအတာသင်္ကြန်ပွဲတော်နဲ့ပတ်သက်တဲ့ အဆိုပြုစာတွဲကို ယူနက်စကို ဒြပ်မဲ့ယဉ်ကျေးမှု အမွေအနှစ် ကော်မတီကို ၂၀၂၃ ခုနှစ် မတ်လ ၂၄ ရက်မှာ ပေးပို့တင်သွင်းခဲ့တာပါ။
မြန်မာနိုင်ငံက တင်သွင်းထားတဲ့ “မြန်မာ့ရိုးရာ နှစ်သစ်ကူးအတာသင်္ကြန်ပွဲတော်” အဆိုပြုစာတွဲကို ကမ္ဘာ့ဒြပ်မဲ့ ယဉ်ကျေးမှု အမွေအနှစ်စာရင်းမှာ ပါဝင်နိုင်ရေးနဲ့ ပတ်သက်ပြီး ပါရာဂွေးနိုင်ငံ အာဆွန်စီယွန်မြို့မှာ ဒီဇင်ဘာ ၅ ရက်က ကျင်းပတဲ့ ၁၉ ကြိမ်မြောက် ဒြပ်မဲ့ယဉ်ကျေးမှုအမွေအနှစ်ညီလာခံမှာ တရားဝင် ဆုံးဖြတ်ခဲ့ပြီး ဖြစ်တယ်လို့ ထုတ် ပြန်ချက်အရ သိရပါတယ်။
မြန်မာ့ရိုးရာ နှစ်သစ်ကူးအတာသင်္ကြန်ပွဲတော်ဟာ ကမ္ဘာ့ဒြပ်မဲ့ယဉ်ကျေးမှုအမွေအနှစ်စာရင်းမှာ မြန်မာနိုင်ငံအနေ နဲ့ ပထမဆုံး တရားဝင် ပါဝင်နိုင်ခဲ့ပြီဖြစ်ပြီး အခုလို ပါဝင်နိုင်တာဟာ မြန်မာ့ယဉ်ကျေးမှုအမွေအနှစ် ထိန်းသိမ်း စောင့်ရှောက်ရေးအသင်း အပါအဝင် မြန်မာနိုင်ငံ ပြည်နယ်နဲ့တိုင်းဒေသကြီးအသီးသီးရှိ တိုင်းရင်းသားစာပေနဲ့ ယဉ်ကျေးမှုအသင်းတွေ၊ အရပ်ဘက်လူမှုအဖွဲ့အစည်းတွေနဲ့ ပြည်သူတွေအားလုံး ပူးပေါင်းပါဝင် ဆောင်ရွက်မှု ကြောင့် ဖြစ်တယ်လို့လည်း ထုတ်ပြန်ချက်မှာ ပါရှိပါတယ်။
မြန်မာ့သင်္ကြန်ပွဲတော်ကို ကမ္ဘာ့ဒြပ်မဲ့ယဉ်ကျေးမှုအမွေအနှစ် စာရင်းမှာ ပါဝင်တဲ့အတွက် ကမ္ဘာက ပိုမိုသိရှိနိုင်တာ၊ မျိုးဆက်သစ် နောင်လာနောက်သားတွေကို လက်ဆင့်ကမ်းအမွေပေးနိုင်တာ၊ အတာသင်္ကြန်ကို ရိုးရာမပျက် ထိန်းသိမ်းကျင်းပနိုင်ရေးအတွက် ပြည်သူလူထုရဲ့ အသိအမြင် ပိုမိုပွင့်လန်းလာစေတာ၊ မြန်မာနိုင်ငံရဲ့ အခြားဒြပ်မဲ့ ယဉ်ကျေးမှုအမွေအနှစ်တွေကို ကမ္ဘာ့ဒြပ်မဲ့ယဉ်ကျေးမှုအမွေအနှစ်စာရင်း တင်သွင်းနိုင်ရေးအတွက် အတွေ့အကြုံ ကောင်းတွေနဲ့ အခွင့်အလမ်းကောင်းတွေ ပိုမိုရရှိလာစေမှာ ဖြစ်တယ်လို့ သိရပါတယ်။
