အိန္ဒိယနိုင်ငံရဲ့ Think Tanks အဖွဲ့ကြီးဖြစ်တဲ့ ကမ္ဘာ့ရေးရာအိန္ဒိယကောင်စီ(ICWA)နဲ့ မြန်မာနိုင်ငံက ပါတီတွေ၊ NSPNC ၊ EAOs တွေနဲ့ တွေ့ဆုံပြီး ဖက်ဒရယ်စနစ်နဲ့ ဖွဲ့စည်းပုံအခြေခံဥပဒေဆိုင်ရာ ကိစ္စရပ်တွေအပေါ် မတ်လ ၁၈ ရက်က မြန်မာနိုင်ငံရှိ အိန္ဒိယသံရုံးရဲ့ အိန္ဒိယစင်တာမှာ တွေ့ဆုံဆွေးနွေးခဲ့ကြတယ်လို့ သိရပါတယ်။ဆွေးနွေးပွဲမှာ ဖွဲ့စည်းပုံအခြေခံဥပဒေဆိုင်ရာ မူဘောင်တွေနဲ့ ဖက်ဒရယ်စနစ်အရေး၊ လူမျိုးပေါင်းစုံနဲ့ ဘာသာ စကားပေါင်းစုံ ဖက်ဒရယ်စနစ်ကို စီမံခန့်ခွဲရာမှာ အိန္ဒိယရဲ့ အတွေ့အကြုံတွေ အားလုံးပါဝင်တဲ့ အုပ်ချုပ်မှုနဲ့ အာဏာခွဲဝေမှုဆိုင်ရာကိစ္စရပ်တွေ၊ အိန္ဒိယဖက်ဒရယ်စနစ်နဲ့ လူမျိုးစု မတူကွဲပြားမှုတွေအရေး စတဲ့ ခေါင်းစဉ် တွေကို အပြန်အလှန်ဆွေးနွေးခဲ့တယ်လို့ ဆိုပါတယ်။
ဆွေးနွေးပွဲကို မြန်မာနိုင်ငံဘက်က အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ(NSPNC)က အတွင်းရေးမှူး ဒုတိယဗိုလ်ချုပ်ကြီးမင်းနိုင် အပါအဝင် ကိုယ်စားလှယ် ၃ ဦး၊ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ထိုးထားတဲ့ လက်နက်ကိုင် ၇ ဖွဲ့အနက် ၅ ဖွဲ့မှ ဒေါ်စောမြရာဇာလင်း၊ နန်းယဉ်ယဉ်စိုး၊ ဗိုလ်မှူးကြီးစောကျော်ညွန့်၊ ရဲဘော်မျိုးဝင်း၊ ဗိုလ်မှူးကြီးခွန်ဥက္ကာတို့ တက်ရောက်ခဲ့ကြပါတယ်။ဒါ့အပြင် နိုင်ငံရေးပါတီတွေဘက်က ပြည်သူ့ပါတီဥက္ကဋ္ဌ ဦးကိုကိုကြီး၊ ရခိုင့်ဦးဆောင်ပါတီဥက္ကဋ္ဌ ဒေါက်တာအေး မောင်၊ အမျိုးသားဒီမိုကရေစီအင်အားစုပါတီဒုဥက္ကဋ္ဌ ဦးထက်အောင်ကျော်၊ တိုင်းလိုင်(ရှမ်းနီ) အမျိုးသားများ ဖွံ့ဖြိုး တိုးတက်ရေးပါတီဥက္ကဋ္ဌ စိုင်းဌေးအောင်၊ ရခိုင်အမျိုးသားပါတီဥက္ကဋ္ဌ ဦးသာထွန်းလှ၊ ပြည်သူ့လွှတ်တော် ကိုယ်စား လှယ်ဟောင်း ဒေါ်ခင်စောဝေ၊ ပြည်သူ့လွှတ်တော်ကိုယ်စားလှယ်ဟောင်း ဦးရဲထွန်း၊ ရန်ကုန်တိုင်းဒေသကြီး လွှတ် တော်ကိုယ်စားလှယ် ဟောင်းဒေါက်တာညိုညိုသင်း၊ စာရေးဆရာ ဦးကျော်ဝင်း၊ USDP မှ ဦးခင်မောင်စိုး၊ ရှမ်းနှင့်တိုင်းရင်း သားများ ဒီမိုကရက်တစ်ပါတီမှ ဦးစောသန်းမြင့်တို့ တက်ရောက်ခဲ့ကြပါတယ်။
မြန်မာနိုင်ငံက နိုင်ငံရေးနှင့်အုပ်ချုပ်ရေး အင်အားစုတွေဟာ ဖက်ဒရယ်ဆိုင်ရာ ဆွေးနွေးမှုတွေကို ၂၀၂၄ ခုနှစ်၊ နိုဝင်ဘာ ၅ ရက်ကနေ ၇ ရက်အထိ အိန္ဒိယနိုင်ငံကို သွားရောက်လေ့လာခဲ့ပြီး အဲဒီခရီးစဉ်ရဲ့ အဆက်အဖြစ် ၂၀၂၅ ခုနှစ်၊ မတ်လ ၁၈ ရက်မှာ မြန်မာနိုင်ငံ၊ ရန်ကုန်မြို့ရှိ အိန္ဒိယစင်တာမှာ ဒုတိယအကြိမ် ကျင်းပတာဖြစ်တယ်လို့ သိရပါတယ်။
