ဆိုက်ဘာလုံခြုံရေးဆိုင်ရာ အသိပညာပေးမြှင့်တင်တာနဲ ဒစ်ဂျစ်တယ်ပိုင်ဆိုင်မှုတွေကို ကာကွယ်ဖို့ အထူးသတိပြု ရမယ့် အကြံပြုချက်တွေနဲ့ပတ်သက်လို့ မြန်မာနိုင်ငံရှိ ဆက်သွယ်ရေးအော်ပရေတာ(၄)ခုက ပူးတွဲကြေညာချက် တစ်စောင် ထုတ်ပြန်လိုက်ပါတယ်။
မြန်မာနိုင်ငံရှိ ဆက်သွယ်ရေးအော်ပရေတာတွေဟာ သုံးစွဲသူတွေရဲ့ အွန်လိုင်းငွေကြေးဆိုင်ရာအကောင့်တွေနဲ့ ပုဂ္ဂိုလ်ရေးဆိုင်ရာအချက်အလက်တွေကို ကာကွယ်နိုင်ဖို့နဲ့ ကြိုတင်ပြင်ဆင်ဆောင်ရွက်နိုင်ဖို့အတွက် အခုလို ဆိုက်ဘာလုံခြုံရေး အကြံပြုချက်တွေကို စုစည်းထုတ်ပြန်လိုက်တာလို့ ဆိုပါတယ်။
အဲဒီကြေညာချက်ထဲမှာ အဆင့်ဆင့်စစ်ဆေးတဲ့စနစ်ကို အသုံးပြုဖို့၊ ခန့်မှန်းရခက်ပြီး ထူးခြားတဲ့စကားဝှက်တွေကို အသုံးပြုဖို့နဲ့ ရှုပ်ထွေးပြီးထူးခြားတဲ့စကားဝှက်တွေ(သင်္ကေတတွေ၊ ကိန်းဂဏန်းတွေ၊ အက္ခရာတွေ)ကို ဖန်တီးပြီး စကားဝှက်တွေကို မကြာခဏပြောင်းလဲဖို့ လိုတယ်လို့ ဆိုပါတယ်။
ဒါ့အပြင် Phishing Scams တွေကို သတိပြုဖို့၊ ဆော့ဖ်ဝဲလ်တွေကို ပုံမှန် Update ပြုလုပ်ပေးဖို့၊ အများသုံး Wi-Fi အသုံးပြုတာတွေမှာ အများသုံး Wi-Fi ကွန်ရက်တွေဟာ လုံခြုံမှုမရှိတာကြောင့် အဲဒီကွန်ရက်တွေကို အသုံးပြုနေ စဉ်မှာ အရေးကြီးတဲ့ အကောင့်တွေကို ဝင်ရောက်တာ ဒါမှမဟုတ် ငွေကြေးဆိုင်ရာ လွှဲပြောင်းမှုတွေ ပြုလုပ်တာ ကို ရှောင်ကြဉ်ဖို့၊ ဗိုင်းရပ်စ်တွေ၊ Spyware၊ Ransomware နဲ့အခြားအန္တရာယ်ရှိတဲ့ ခြိမ်းခြောက်မှုတွေကို ကာကွယ် ဖို့အတွက် ယုံကြည်စိတ်ချရတဲ့ Antivirus နဲ့ Anti-Malware ဆော့ဖ်ဝဲတွေကို အသုံးပြုဖို့ လိုအပ်တယ်လို့ ဆိုပါ တယ်။
အဲဒီအပြင် သံသယဖြစ်ဖွယ် ဆက်သွယ်မှုတွေကို သတိရှိဖို့၊ တစ်ကြိမ်တစ်ခါသုံး လျှို့ဝှက်နံပါတ်(OTP)ကို အသုံး ပြုဖို့၊ Application ခွင့်ပြုချက်တွေကို သတိပြုဖို့၊ အမည်မသိဖုန်းခေါ်ဆိုမှုတွေကို သတိပြုဖို့၊ ယုံကြည်စိတ်ချရတဲ့ အရင်းအမြစ်တွေက Application တွေကို ထည့်သွင်းဖို့နဲ့ အတည်မပြုရသေးတဲ့ ဒေါင်းလုတ်တွေမှာ သုံးစွဲသူရဲ့ စက်ပစ္စည်းတွေနဲ့ ဒေတာကို ထိခိုက်ပျက်စီးစေတဲ့ Malware ဒါမှမဟုတ် ဗိုင်းရပ်စ်တွေ ပါဝင်နိုင်တာကြောင့် Official Store တွေ၊ ယုံကြည်စိတ်ချရတဲ့အရင်းအမြစ်တွေက ဆော့ဖ်ဝဲနဲ့ Application တွေကိုသာ ဒေါင်းလုတ် လုပ်ဖို့ လိုတယ်လို့ ပါရှိပါတယ်။
ခွင့်ပြုချက်မရှိတဲ့ လုပ်ဆောင်မှုတွေကို သံသယရှိလာရင် ဒါမှမဟုတ် အကူအညီလိုအပ်ရင် အော်ပရေတာတွေရဲ့ Hotline အချိန်တွေအတွင်း Customer Service ထံကို ဆက်သွယ်မေးမြန်းနိုင်တယ်လို့လည်း ထုတ်ပြန်ထားပါ တယ်။
