FMI ကုမ္ပဏီအုပ်စုရဲ့ ဒါရိုက်တာအဖွဲ့ကို စက်တင်ဘာ၅ရက်က ပြောင်းလဲဖွဲ့စည်းလိုက်ပြီး အမှုဆောင်ဥက္ကဋ္ဌဖြစ်သူဦးသိမ်းဝေဟာရာထူးကနေအနားယူလိုက်ပြီဖြစ်တယ်လို့ FMIက ကြေညာပါတယ်။
ဦးသိမ်းဝေဟာ FMIရဲ့ အမှုဆောင်ဥက္ကဋ္ဌအဖြစ် ၂၀၀၄ခုနှစ်ကစ တာဝန်ယူခဲ့တာဖြစ်ပြီး နှစ်ပေါင်း၂၀ကျော်ကြာ တာဝန်ထမ်းဆောင်ခဲ့မှုအတွက် အထူးကျေးဇူးတင်ရှိပါတယ်လို့ ကြေညာချက်မှာဖော်ပြထားပါတယ်။
လက်ရှိမှာ ကုမ္ပဏီရဲ့ အမှုဆောင်အရာရှိချုပ်နဲ့ အမှုဆောင်ဒါရိုက်တာအဖြစ် ဦးထွန်းထွန်းကိုခန့်အပ်လိုက်ပြီး ပြောင်းလဲဖွဲ့စည်းလိုက်တဲ့ ဒါရိုက်တာအဖွဲ့ထဲမှာ ဦးထွန်းထွန်း၊ ပါမောက္ခဒေါက်တာအောင်ထွန်းသက်၊ ဦးသန်းအောင်၊ ဦးကြည်အေးနဲ့ ဦးလင်းမြိုင်တို့ ပါဝင်တယ်လို့ဆိုပါတယ်။
ဦးသိမ်းဝေဟာ ပြီးခဲ့တဲ့ဇူလိုင်လအတွင်းကလည်း Yoma Strategic Holdings လီမိတက်ရဲ့ အမှုဆောင်ဥက္ကဋ္ဌ ရာထူးကနေ နုတ်ထွက်ခဲ့ပြီး သားဖြစ်သူမယ်လ်ဗင်ပန်းကို ဥက္ကဋ္ဌနဲ့အမှုဆောင်အရာရှိချုပ်အဖြစ် ခန့်အပ်ထားခဲ့ပါတယ်။
FMIကုမ္ပဏီအုပ်စုဟာ မြန်မာနိုင်ငံရဲ့ အထင်ကရ စီးပွားရေးလုပ်ငန်းစုကြီးတွေထဲကတစ်ခုဖြစ်ပြီး ရန်ကုန်စတော့အိတ်ချိန်းမှာ ၂၀၁၆ခုနှစ်က ပထမဆုံးစာရင်းဝင်ခဲ့တဲ့ကုမ္ပဏီဖြစ်ပါတယ်။
