မြန်မာနိုင်ငံလုံးဆိုင်ရာ တမီ(လ်) ဟိန္ဒူဖောင်ဒေးရှင်း(ဗဟို)က ၂၁ ကြိမ်မြောက် ဝါဆိုသင်္ကန်းနဲ့ ဆွမ်းဆပ်ကပ်လှူဒါန်းတဲ့အခမ်းအနားကို ဩဂုတ်လ၃ ရက်၊ မနက် ၁၀ နာရီက ရန်ကုန်မြို့၊ ကမ္ဘာအေးကုန်းမြေရှိနိုင်ငံတော်ပရိယတ္တိသာသနာ့တက္ကသိုလ်(ရန်ကုန်)၊ မိုးကုတ်ဆွမ်းစားကျောင်းမှာ ကျင်းပပါတယ်။
အခမ်းအနားမှာ နိုင်ငံတော်ပရိယတ္တိသာသနာ့တက္ကသိုလ်(ရန်ကုန်)မှာ သီတင်းသုံးတော်မူကြတဲ့ သံဃာတော်အရှင်သူမြတ် အပါး (၄၀၀) ကျော်ကို ဝါဆိုသင်္ကန်းနဲ့ နေ့ဆွမ်းဆပ်ကပ်လှူဒါန်းပါတယ်။အခမ်းအနားကို နမောတဿ ၃ ကြိမ်ရွတ်ဆို ဘုရားကန်တော့ဖွင့်လှစ်ခဲ့ပြီး နိုင်ငံတော်ပရိယတ္တိသာသနာ့တက္ကသိုလ်(ရန်ကုန်)၊ ဒုတိယပါမောက္ခချုပ်(သင်ကြား) အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ ဒေါက်တာဘဒ္ဒန္တဇောတိက ဆရာတော်အရှင်သူမြတ်က ငါးပါးသီလ ချီးမြှင့်တော်မူပါတယ်။
ဆက်လက်ပြီး မြန်မာနိုင်ငံလုံးဆိုင်ရာ တမီ(လ်) ဟိန္ဒူဖောင်ဒေးရှင်း(ဗဟို)ရဲ့ ဥက္ကဋ္ဌ သီဟသုဓမ္မမဏိတောတဓရ ဦးသိန်းလွင်က အသင်းရဲ့ ဆောင်ရွက်ချက်တွေကို ရှင်းလင်းဖတ်ကြားပါတယ်။အဲဒီနောက် ဆရာတော်၊ သံဃာတော်တွေကို ဝါဆိုသင်္ကန်းနဲ့ လှူဖွယ်ဝတ္ထုပစ္စည်းတွေ၊ နဝကမ္မအလှူတော်ငွေတွေ ဆက်ကပ်လှူဒါန်းကြပြီး ရေစက်သွန်းချ အမျှပေးဝေကာ ဆရာတော်၊ သံဃာတော်တွေကို နေ့ဆွမ်းဆပ်ကပ် လှူဒါန်းခဲ့ကြပါတယ်။
