ရန်ကုန်တိုင်းဒေသကြီး၊ စမ်းချောင်းမြို့နယ်ရှိ မဟာမြိုင်ဘုန်းဘုရား စာသင်တိုက်ရဲ့ နှစ်စဉ် ကျင်းပမြဲဖြစ်တဲ့ ထမနဲ ပွဲကို ဖေဖော်ဝါရီ ၁၂ ရက်က ကျောင်းတိုက်အတွင်း ကျင်းပခဲ့ပြီး လူပုဂ္ဂိုလ်တွေကို ဧည့်ခံကျွေးမွေးခဲ့တယ်လို့ သိရပါတယ်။ ထမနဲထိုးပွဲကိုတော့ ဖေဖော်ဝါရီ ၁၁ ရက်က ကျောင်းတိုက်အတွင်းမှာ ပြုလုပ်ခဲ့ပြီး ထမနဲဒယ် ၆၀ လောက်ကို သံဃာတွေနဲ့ လူပုဂ္ဂိုလ် ၃၀ လောက်က စုပေါင်းပြုလုပ်ခဲ့တာလို့ ဆိုပါတယ်။
ထမနဲပွဲ ကျင်းပလာတာဟာ ပထမ မဟာမြိုင်ဆရာတော်ကြီး လက်ထက်ကတည်းကဖြစ်ပြီး နှစ်ပေါင်း ၈၀ နီးပါး ကြာမြင့်လာပြီ ဖြစ်တယ်လို့ မဟာမြိုင်ဘုန်းဘုရား စာသင်တိုက်ရဲ့ ပဓာန နာယကဆရာတော် ဘဒ္ဒန္တ သီဟက မိန့်ကြားပါတယ်။ ထမနဲပွဲ နှစ်စဉ်ကျင်းပတာဟာ တပို့တွဲလပြည့်နေ့မှာ ထမနဲဆွမ်းတော်ကပ်ပြီး တပည့် ဒါယကာ ဒါယိကာမ တွေကို ရောဂါဘယ ကင်းဝေးစေဖို့ ရည်ရွယ်ချက်နဲ့ ကျွေးမွေးလှူဒါန်းတာ ဖြစ်တယ်လို့ ဆိုပါတယ်။
ထမနဲထိုးရာမှာ ကောင်းမွန်တဲ့ ထမနဲဖြစ်အောင် ကြိုးစားလုပ်ဆောင်ခဲ့ပြီး အခုလို ပါဝင်ကူညီခွင့်ရတဲ့အတွက် ဝမ်း သာပိတီ ဖြစ်မိတယ်လို့ ထမနဲထိုးရာမှာ ပါဝင်သူ ကိုကျော်ထူးအောင်က ပြောပါတယ်။လာမယ့်နှစ်တွေမှာလည်း ကျောင်းတိုက်ရဲ့ အစဉ်အလာမပျက် ထမနဲပွဲကို ထိန်းသိမ်းစောင့်ရှောက်ပြီး ဆက်လက် ကျင်းပသွားမယ်လို့ ဘဒ္ဒန္တသီဟက မိန့်ကြားခဲ့ပါတယ်။
