ဇိုမီးအမျိုးသားပါတီနဲ့ ပအိုဝ်းအမျိုးသား ညီညွတ်ရေးပါတီတွေရဲ့ ပါတီတည်ထောင်ခွင့် လျှောက်ထားချက်ကို ဇွန် ၂၄ ရက်မှာ ခွင့်ပြုလိုက်တယ်လို့ ပြည်ထောင်စုရွေးကောက်ပွဲ ကော်မရှင်က ထုတ်ပြန်ပါတယ်။လက်ရှိအချိန်အထိ ပါတီတည်ထောင်ခွင့် လျှောက်ထားလာတဲ့ အဖွဲ့ ၂၇ ဖွဲ့ရှိပြီး အဲဒီထဲက ဇိုမီးအမျိုးသားပါတီနဲ့ ပအိုဝ်း အမျိုးသားညီညွတ်ရေးပါတီတို့ဟာ နိုင်ငံရေးပါတီများ မှတ်ပုံတင်ခြင်း ဥပဒေ၊ နည်းဥပဒေတွေနဲ့ ညီညွတ်ကြောင်း စိစစ်တွေ့ရှိရတဲ့အတွက် ခွင့်ပြုလိုက်တာလို့ ဆိုပါတယ်။
ပါတီတည်ထောင်ခွင့်ရရှိတဲ့ ပါတီနှစ်ခုအနေနဲ့ ခွင့်ပြုချက် ရရှိတဲ့ နေ့ကစပြီး ရက်ပေါင်း ၃၀ အတွင်း နိုင်ငံရေးပါတီ များ မှတ်ပုံတင်ခြင်း နည်းဥပဒေ ၇ နဲ့အညီ ကော်မရှင်ကို နိုင်ငံရေးပါတီအဖြစ် မှတ်ပုံတင်ပေးဖို့ လျှောက်ထားရမှာ ဖြစ်ပါတယ်။အဲဒီအပြင် ဦးဘရှိန် ခေါင်းဆောင်တဲ့ ရခိုင်တိုင်းရင်းသားများပါတီကလည်း နိုင်ငံရေးပါတီများ မှတ်ပုံတင်ခြင်း နည်းဥပဒေ ၇ နဲ့အညီ ဇွန် ၂၄ ရက်မှာ နိုင်ငံရေးပါတီအဖြစ် မှတ်ပုံတင်ပေးဖို့ လျှောက်ထားလာတယ်လို့ သိရပါတယ်။လက်ရှိမှာတော့ မှတ်ပုံတင်ခွင့်ပြုပေးဖို့ လျှောက်ထားတဲ့ နိုင်ငံရေးပါတီတွေထဲက ၁၄ ပါတီကို မှတ်ပုံတင်ခွင့်ပြုခဲ့ ပြီး ကျန်ပါတီတွေကို မှတ်ပုံတင်ခွင့်ပြုနိုင်ရေး ဆက်လက်ဆောင်ရွက်နေတယ်လို့လည်း ရွေးကောက်ပွဲကော်မရှင် က ထုတ်ပြန်ထားပါတယ်။
