ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)မြို့နယ်မှာရပ်ထားတဲ့ ကွန်တိန်နာကားကို အိမ်စီးကားက နောက်ကနေဝင်တိုက်မိရာ ယာဉ်မောင်းအမျိုးသားတစ်ယောက်သေဆုံးခဲ့တယ်လို့ မြန်မာနိုင်ငံမီးသတ်တပ်ဖွဲ့ကသိရပါတယ်။
အခင်းဖြစ်စဉ်ကတော့ စက်တင်ဘာလ ၅ ရက် ည ၁၁ နာရီခွဲကျော်လောက်က ဒဂုံမြို့သစ်(အရှေ့ပိုင်း)မြို့နယ်၊(၁၃)ရပ်ကွက်၊ အမှတ်(၂)လမ်းမှာ Fielder(ဖီဒါ)အမျိုးအစား အိမ်စီးကားက ရပ်ထားတဲ့ကွန်တိန်နာယာဉ်ကို နောက်ကနေဝင်ရောက်တိုက်မိခဲ့တာလို့ဆိုပါတယ်။
ယာဉ်တိုက်မှုဖြစ်ပွားရာနေရာကို သက်ဆိုင်ရာမီးသတ်တပ်ဖွဲ့က ရှာဖွေကယ်ဆယ်ရေးလုပ်ငန်းတွေ သွားရောက်ဆောင်ရွက်ခဲ့ရာအိမ်စီးကားခေါင်းခန်းထဲမှာညပ်နေတဲ့ ယာဉ်မောင်းအမျိုးသားကိုဆွဲထုတ်ယူခဲ့ရပြီး သေဆုံးနေတာတွေ့ရတယ်လို့ သိရပါ တယ်။
သေဆုံးရုပ်အလောင်းကိုတော့ ရှင်သန်ခွင့်အသင်းလူနာတင်ယာဉ်နဲ့ မြောက်ဥက္ကလာပမြို့နယ် ပြည်သူ့ဆေးရုံကြီးကို ပို့ဆောင်ပေးခဲ့တယ်လို့လည်းသိရပါတယ်။
