ငလျင်ဒဏ်ကြောင့် ထိခိုက်ပျက်စီးခဲ့တဲ့ မြန်မာနိုင်ငံတစ်ဝန်းက ပြည်သူတွေကို ကာလရှည်ထောက်ပံ့နိုင်ဖို့ KBZ Center Mandalay ကို ဇွန်လ ၁၀ ရက် စတင် ဖွင့်လှစ်လိုက်ပြီလို့ KBZ Foundation က ထုတ်ပြန်ပါတယ်။KBZ Center Mandalay ကို မန္တလေးမြို့၊ ချမ်းမြသာစည်မြို့နယ်၊ (၇၃) လမ်း x (၁၁၀) လမ်းမှာ တည်ရှိတဲ့ ၁၆ ဧက ကျယ်ဝန်းတဲ့ မြေကွက်ပေါ်မှာ ဖွင့်လှစ်လိုက်တာပါ။
KBZ Center Mandalay စတင်ဖွင့်လှစ်လိုက်တဲ့ ဇွန်လ ၁၀ ရက်က မန္တလေးမြို့ရှိ ပြိုကျပျက်စီးခဲ့တဲ့ ဘုန်းတော်ကြီး ကျောင်းနဲ့သီလရှင်ကျောင်း (၁၉)ကျောင်း အပါအဝင် ဘာသာရေး အဆောက်အဦ (၂၅)လုံးအတွက် ကနဦးအနေနဲ့ ဘိလပ်မြေအိတ် (၆၇၀၀)နဲ့ ဆန်အိတ် (၈၇၀)တို့ကို တာဝန်ရှိသူတွေထံ ပေးအပ်လှူဒါန်းခဲ့တယ်လို့ ထုတ်ပြန် ချက်မှာ ဖော်ပြထားပါတယ်။KBZ Center Mandalay မှာတော့ စိတ်ကျန်းမာရေး အပါအဝင် လူနာ ၇၀၀ လောက်ကို အခမဲ့ နေ့စဉ် ကုသနိုင်တဲ့ ဆေးကုသခန်းတွေ၊ Call Center က တစ်ဆင့် အကူအညီတောင်ခံနိုင်မယ့် ထောက်ပံ့လှူဒါန်းရေးစင်တာ၊ အခမဲ့ စားသုံးနိုင်မဲ့ နေ့လယ်စာ၊ ညစာ ထမင်းစားဆောင်၊ သောက်ရေသန့်နဲ့ သုံးရေ အခမဲ့ ဖြန့်ဖြူးပေးတာ၊ အခမဲ့ အသုံးပြုနိုင်မယ့် ရေချိုးခန်း၊ အိမ်သာနဲ့ အဝတ်လျှော်စက်တွေ စီစဉ်ထားရှိတာ၊ အခမဲ့ အသုံးပြုနိုင်မယ့် LPG Gas မီးဖိုဆောင်တွေ ပါဝင်တယ်လို့ ထုတ်ပြန်ချက်အရ သိရပါတယ်။ အဲဒီအပြင် KBZ Center Mandalay မှာ ငလျင်ဘေးသင့် ပြည်သူတွေ အိမ်ရာ အမြန်ဆုံး တည်ဆောက်နိုင်ဖို့နဲ့ စီးပွားရေးလုပ်ငန်းတွေ အရှိန်အဟုန်နဲ့ လည်ပတ်နိုင်ဖို့ KBZ Bank ရဲ့ သီးသန့် Home Loan အထူးချေးငွေဌာန (နှစ်ရှည်)၊ အထူးချေးငွေဌာန (SME အလျင်အမြန်)နဲ့ Corporate Loan ထုတ်ချေးမှုတို့ တစ်ပါတည်း ထည့်သွင်း ထားတယ်လို့လည်း ထုတ်ပြန်ချက်မှာ ပါရှိပါတယ်။
Center မှာ ဘဏ်ဝန်ဆောင်မှုတွေကို အမြန်ဆုံး နဲ့ အထိရောက်ဆုံး ဖြစ်စေဖို့ ကောင်တာတွေ ဖွင့်ပြီး လုပ်ထုံး လုပ်နည်းတွေနဲ့ အညီ စိစစ်ကာ ဘဏ်ခွဲတွေက တစ်ဆင့် ချေးငွေတွေ အမြန်ထုတ်ချေး ပေးသွားမယ်လို့လည်း ဆိုပါတယ်။KBZ Center Mandalay မှာ သဘာဝဘေး ကယ်ဆယ်ရေး သင်တန်းတွေ၊ Training တွေ ပို့ချနိုင်မယ့် ဘက်စုံသုံး ခန်းမတွေ (Multi Purpose Rooms) တွေကိုလည်း ထည့်သွင်းထားတဲ့အတွက် သဘာဝ ဘေးအန္တရာယ်ဆိုင်ရာ ပို့ချချက် Training တွေကိုလည်း ပြုလုပ်နိုင်မှာ ဖြစ်တယ်လို့ သိရပါတယ်။ငလျင်ဘေးသင့် ပြည်သူတွေအတွက် ထိရောက်၊ လွယ်ကူ၊ လျင်မြန်စေဖို့ KBZPay Center ၊ KBZMS General Insurance ၊ KBZ Life Insurance တို့ကလည်း စင်တာမှာ ဝန်ဆောင်မှုတွေ ပေးအပ်သွားမှာ ဖြစ်တယ်လို့လည်း ထုတ်ပြန်ချက်အရ သိရပါတယ်။KBZ Foundation က ငလျင်ဘေးအတွက် ငွေကျပ် ၄၅ ဘီလီယံ ကနဦး မတည်လှူဒါန်းထားတဲ့အနက် ငလျင် ဘေးသင့် ပြည်သူတွေကို အနည်းဆုံး တစ်နှစ်ကနေ ငါးနှစ်အထိ ရေရှည်ကူညီပေးနိုင်မယ့် KBZ Center Mandalay ကို ကနဦး အနေဖြင့် ငွေကျပ် ၃၀ ဘီလီယံ အသုံးပြုကာ ဖွင့်လှစ်ခဲ့တာ ဖြစ်တယ်လို့လည်း ထုတ်ပြန် ထားပါတယ်။
