တနင်္သာရီတိုင်းဒေသကြီး၊ ကျွန်းစုမြို့နယ်က ဧရိယာအကျယ်အဝန်း (၆၃၅၄)ဧကရှိတဲ့ နယ်မြေကို ချောင်းညီကို ဒီရေတော ကြိုးပြင်ကာကွယ်တောသတ်မှတ်အဖြစ် ဇူလိုင် ၂၂ ရက်ကစပြီး သတ်မှတ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ပါတယ်။သစ်တောဥပဒေပုဒ်မ (၆)၊ ပုဒ်မခွဲ (င) အရ အပ်နှင်းထားတဲ့ လုပ်ပိုင်ခွင့်ကို ကျင့်သုံးပြီး အခုလို အမိန့် ကြော်ငြာစာ ထုတ်ပြန်လိုက်တာပါ။
ချောင်းညီကို ဒီရေတော ကြိုးပြင်ကာကွယ်တော သတ်မှတ်လိုက်တဲ့အတွက် ဒီရေတောသစ်မျိုးတွေဖြစ်တဲ့ ဗြူး ခြေထောက်၊ ဗြူးအုပ်ဆောင်း၊ လမု၊ လဘ၊ ကနစို၊ သမဲ့၊ ကျန၊ မဒမ၊ ပင်လယ်အုန်း စတဲ့ သစ်မျိုးတွေနဲ့ သရော၊ နှံဗြူး(ငှက်)နဲ့ ဓနိပင် စတဲ့ ဒေသမျိုးရင်း ဒီရေတောသစ်မျိုးတွေကို ထိန်းသိမ်းနိုင်မှာ ဖြစ်ပါတယ်။ ဗျိုင်း၊ ဗျိုင်းအောက်၊ စွန်၊ သိမ်းငှက်၊ ပန်းဇင်ငှက်၊ ခရုစုပ်ငှက်၊ ရေညှောင့်နှုတ်ဝိုင်းငှက်၊ တင်ကျီးငှက်၊ ငှက်တုံးငှက် စတဲ့ ငှက်မျိုးတွေရဲ့ နေရင်းဒေသကိုလည်း ထိန်းသိမ်းနိုင်မှာဖြစ်သလို သား၊ ငါး၊ ကဏန်း၊ ပုစွန်တွေ ရှင်သန် ပေါက်ဖွားရာ ဂေဟစနစ် ပိုမိုကောင်းမွန်စေတာ၊ အဏ္ဏဝါ ဂေဟစနစ်ကို တည်ငြိမ်မှုအတွက် ဂေဟစနစ်တစ်ခု ဖြစ်တာနဲ့ သဘာဝ ဘေးအန္တရာယ်ကနေ ကာကွယ်ပေးနိုင်တာ စတဲ့ အကျိုးကျေးဇူးတွေ ရရှိနိုင်မှာ ဖြစ်တယ်လို့ သိရပါတယ်၊၊
ဒါ့အပြင် ဒီရေတောဂေဟစနစ် ရေရှည်တည်တံ့စေဖို့၊ ဇီဝမျိုးစုံမျိုးကွဲတွေ ပေါကြွယ်ဝဖို့၊ လှိုင်းဒဏ်/ လေမုန်တိုင်း ဒဏ် ခံစားမှုတွေကို သဘာဝ တံတိုင်းကြီးသဖွယ် ကာကွယ်ဖို့အပြင် ဒေသခံပြည်သူတွေ ရေသယံဇာတ စဉ်ဆက် မပြတ် ထုတ်ယူသုံးစွဲနိုင်ဖို့နဲ့ ဒီရေတောဂေဟစနစ် စီမံအုပ်ချုပ်မှု ပိုမိုကောင်းမွန်လာစေရေး ရည်ရွယ်ပြီး ဒီရေတော ကြိုးဝိုင်း/ကြိုးပြင်ကာကွယ်တောတွေ ဖွဲ့စည်းသတ်မှတ်တာ ဖြစ်တယ်လို့လည်း ထုတ်ပြန်ထားပါတယ်။
