ကနေဒါဟာ အာတိတ်ဒေသ လုံခြုံရေးအတွက် ဩစတြေးလျနဲ့ ပူးပေါင်းပြီး လေကြောင်းရန်ကာကွယ်ရေး အချက်ပြရေဒါစနစ် တည်ဆောက်မယ်လို့ ကနေဒါဝန်ကြီးချုပ် မက်ကာနေးက မတ်လ ၁၈ ရက်မှာ ကြေညာပါ တယ်။
ဒီစီမံကိန်းအတွက် ရင်းနှီးမြှုပ်နှံမှုက ကနေဒီယန်ဒေါ်လာ ၆ ဘီလီယံ (အမေရိကန်ဒေါ်လာအနေနဲ့ ၄ ဒသမ ၂ ဘီလီယံ)ဖြစ်ပြီး အာတိတ်ဒေသမှာ ဝေဟင်နဲ့ ရေလမ်းကြောင်းက ခြိမ်းခြောက်မှုတွေကို ကနေဒါအနေနဲ့ ရှာဖွေ တုံ့ပြန်နိုင်မယ်လို့ မက်ကာနေးက သတင်းစာရှင်းလင်းပွဲမှာ သတင်းထောက်တွေကို ပြောကြားခဲ့ပါတယ်။ ကနေဒါနိုင်ငံသားအားလုံးကို ဘေးကင်းစေမယ်လို့လည်း သူက ဆိုပါတယ်။ကနေဒါဟာ ဒီလေကြောင်းရန် အချက်ပြစနစ်ကို ဩစတြေးလျကနေ ဝယ်ယူမှာဖြစ်ပြီး ဒီသဘောတူညီချက်က နှစ်နိုင်ငံအကြား ပိုမိုနက်ရှိုင်းတဲ့ စစ်ရေးပူးပေါင်းဆောင်ရွက်မှု ဖြစ်လာပါတယ်။
ကာလရှည်ကြာမဟာမိတ်ဖြစ်ခဲ့တဲ့ အမေရိကန်နဲ့ ကနေဒါတို့ရဲ့ ဆက်ဆံရေးဟာ အမေရိကန်သမ္မတ ဒေါ်နယ် ထရမ့်လက်ထက်မှာ ယိမ်းယိုင်လာပြီး တဲ့နောက် ကနေဒါက ကာကွယ်ရေးစနစ်တွေ တိုးချဲ့ဖို့ လုပ်ဆောင်နေတာပါ။ အာတိတ်ဒေသမှာ ပြိုင်ဆိုင်မှုတွေ တိုးလာတဲ့အတွက်လည်း ကနေဒါ ဝန်ကြီးချုပ်သစ် မက်ကာနေးက ကနေဒါမြောက်ပိုင်း အာတိတ်ဒေသမှာ စစ်ရေးတိုးချဲ့မှုတွေလုပ်ဖို့ စီစဉ်လာတာ ဖြစ်ပါတယ်။
