ယူကရိန်း – ရုရှား နှစ်နိုင်ငံစစ်သုံပန်းလဲလှယ်ရေးအစီအစဥ်အရ တပ်ဖွဲဝင် ၁၇၅ ယောက် မတ်လ ၁၉ ရက်နေ့က ပြန်လည်လွတ်မြောက်လာကြောင်း ယူကရိန်းအစိုးရက သတင်းထုတ်ပြန်ထားတာကို BBC သတင်းမှာ ဖော်ပြထား ပါတယ်။ အာရပ်စော်ဘွားများ ပြည်ထောင်စုက ကြားဝင်ဖျန်ဖြေပေးခဲ့တဲ့ ယူကရိန်းစစ်သား ၁၇၅ ယောက် ယူကရိန်းမြေပေါ် ပြန်လည်ရောက်ရှိလာခဲ့ကြောင်း ယူကရိန်းသမ္မတက ကြေညာချက်ထုတ်ပြန်ခဲ့တာဖြစ်ပါတယ်။
ပြန်လည်လွတ်မြောက်လာသူတွေထဲမှာ အပြင်းအထန်ဒဏ်ရာရထားသူတွေ၊ ရုရှားရဲ့ နှိပ်စက်မှုခံခဲ့ရတဲ့ တပ်ဖွဲဝင် တွေလည်း ပါဝင်တယ်လို ဆိုပါတယ်။ နောက်ထပ် တပ်ဖွဲဝင် ၂၂ ယောက်လည်း မကြာခင်အချိန်ပိုင်းမှာ ယူကရိန်း မြေကို ပြန်လည်ရောက်ရှိလာမယ်လို သတင်းထုတ်ပြန်ချက်မှာ ဖော်ပြခဲ့ပါတယ်။ အမေရိကန်သမ္မတ ဒေါ်နယ် ထရမ့်နဲ့ ရုရှားသမ္မတ ဗလာဒီမာပူတင်တို မတ်လ ၁၈ ရက်နေ့က ဖုန်းခေါ်ဆိုမှုအပြီးမှာ ဒီလဲလှယ်မှုသတင်း ထွက်ပေါ်လာတာပါ။ လဲလှယ်မှု တစ်စိတ်တစ်ပိုင်းအနေနဲ့ ရုရှားစစ်သား ၁၇၅ ယောက်ကိုလည်း ပြန်လည်ခေါ်ဆောင်လာခဲ့တယ်လို သိရပါတယ်။
တပ်ဖွဲဝင်တွေပြန်လွတ်မြောက်ရေးအတွက် ကြားဝင်ဆောင်ရွက်ပေးခဲ့တဲ့ အာရပ်စော်ဘွားများ ပြည်ထောင်စု နိုင်ငံနဲ့ ကူညီပေးသူ အားလုံးကို ကျေးဇူးတင်တယ်လို သမ္မတ ဇယ်လန်စကီးက ပြောပါတယ်။ ဒါ့အပြင် ရုရှား လက်ထဲမှာ ရှိနေတဲ့ ယူကရိန်းနိုင်ငံသားတွေနဲ့ သူရဲကောင်းတပ်ဖွဲဝင်အားလုံးကို မိသားစုတွေဆီ အမြန် ပြန်ရောက်လာရေးအတွက် အချိန်ပြည့် အားစိုက်လုပ်ဆောင်နေ တယ်လိုလည်း ဇယ်လန်စကီးက ပြောဆိုခဲ့ ပါတယ်။
