နျူလက်နက်မျှဝေရေး ပြင်သစ်၊ ဗြိတိန်နှင့် ဆွေးနွေးလိုဟု ဂျာမနီခေါင်းဆောင်သစ်ပြော

နျူကလီးယားလက်နက်တွေ မျှဝေသုံးစွဲရေးအတွက် ပြင်သစ်၊ ဗြိတိန်တို့နဲ့ ဆွေးနွေးလိုကြောင်း ဂျာမနီ အဓိပတိသစ် ဖြစ်လာတော့မယ့် ဖရိုင်းဒရစ်ဂျ် မာ့ဇ်က ပြောကြားလိုက်ပါတယ်။ဒါပေမယ့် ဥရောပတိုက်အတွက် အမေရိကန်ရဲ့ နျူးကလီးယား အကာအကွယ်နေရာမှာ အစားထိုးဖို့ မဟုတ်ဘူးလို့လည်း မာ့ဇ်က ဖြည့်စွက်ပြောပါတယ်။ဂျာမနီဟာ ဒုတိယကမ္ဘာစစ်မှာ စစ်ရှုံးနိုင်ငံဖြစ်ခဲ့တဲ့ အတိတ်ကြောင့် နျူးကလီးယားလက်နက် ထုတ်လုပ်နိုင်စွမ်းရှိပေမယ့် မထုတ်လုပ်ဖို့ သဘောတူစာချုပ်တွေ လက်မှတ်ထိုးထားတာဖြစ်ပါတယ်။ ဒါပေမဲ့ NATO အဖွဲရဲ့ နျူးကလီးယားလက်နက် မျှဝေရေး အစီအမံတွေမှာ ပါဝင်ခွင့်ရနေပါတယ်။ အမေရိကန် နျူးကလီးယားလက်နက် တချို့လည်း ဂျာမနီမှာ တပ်ဆင်ထားပါတယ်။

ဒါကြောင့် ဂျာမနီဟာ ကမ္ဘာမှာ စီးပွားရေးအင်အားအရ အမေရိကန်နဲ့ တရုတ်ပြီးရင် တတိယအင်အားအကြီးဆုံးနိုင်ငံ၊ ဥရောပမှာ ဩဇာအကြီးဆုံးနိုင်ငံကြီး ဖြစ်ပေမယ့် နျူလက်နက်ပိုင်နိုင်ငံ တော့ဖြစ်မလာခဲ့ပါဘူး။ဥရောပမှာ ရုရှားနဲ့အတူ ဗြိတိန်၊ ပြင်သစ်တို့က နျူလက်နက်နိုင်ငံတွေ ဖြစ်ကြပါတယ်။ မာ့ဇ်ရဲ့ ကွန်ဆာဗေးတစ်ဝါဒီ CDU/CSU ညီအမပါတီဟာ ဆိုရှယ်ဒီမိုကရက်ပါတီ (SPD) နဲ့ ညွန့်ပေါင်းအစိုးရ ဖွဲ့စည်းဖို့ မူဘောင်တွေ သဘောတူအပြီးနောက်တစ်နေ့ဖြစ်တဲ့ မတ် ၉ ရက်မှာ နျူးကလီးယားကိစ္စ ပြောကြားလိုက်တာဖြစ်ပါတယ်။ပြင်သစ်၊ ဗြိတိန်တို့နဲ့ နျူးကလီးယားလက်နက်တွေ မျှဝေလိုက်တဲ့အတွက် ရန်ကိုတားဆီးဖို့ ပိုမိုအားကောင်းလာမှာဖြစ်ပေမယ့် အမေရိကန်ရဲ့ နျူးကလီးယားဒိုင်းအတွက် ဖြည့်စွက်တဲ့ အမြင်မျိုးနဲ့သာ ဆောင်ရွက်မှာဖြစ်တယ်လို မာ့ဇ်က ပြောပါတယ်။