အမေရိကန်ပြည်ထောင်စု အနောက်ပိုင်း နီဗားဒါးပြည်နယ် ရီနိုမြို့ရှိ ကာစီနိုအပြင်ဘက်မှာ ဇူလိုင် ၂၈ ရက်က သေနတ်သမားတစ်ယောက်က ပစ္စတိုအသုံးပြု ပစ်ခတ်ခဲ့တာကြောင့် လူ ၃ ယောက် သေဆုံးပြီး နှစ်ယောက်က ဒဏ်ရာပြင်းထန်တယ်လို့ ရဲတပ်ဖွဲ့က ပြောကြားထားတာကို ကိုးကားပြီး Reuters သတင်းမှာ ဖော်ပြထားပါတယ်။
နီဗားဒါးပြည်နယ်ရဲ့ တတိယမြောက် လူဦးရေအများဆုံးမြို့ဖြစ်တဲ့ ရီနိုမြို့က အထပ်မြင့်ကာစီနိုနဲ့ ဟိုတယ်ဇုန် တစ်ခုဖြစ်တဲ့ Grand Sierra Resort ရဲ့ ကားရပ်နားရာနေရာမှာ ဇူလိုင် ၂၈ ရက် ဒေသစံတော်ချိန် မနက် ၇ နာရီခွဲ ဝန်းကျင်မှာ ပစ်ခတ်မှုဖြစ်ပွားခဲ့တာပါ။အမည်မသိ သံသယရှိသူကို ရဲတပ်ဖွဲ့က ဖမ်းဆီးထားပြီး သေနတ်ပစ်ခတ်ရတဲ့အကြောင်းရင်းကို သက်ဆိုင်ရာ တာဝန်ရှိသူတွေက ဆက်လက်စုံစမ်းနေတယ်လို့ သိရပါတယ်။
အခုအချိန်မှာ သေဆုံးသူတွေနဲ့ သံသယရှိသူအကြား ဆက်နွှယ်မှု ရှိမရှိကို စုံစမ်းစစ်ဆေးနေတာဖြစ်ပြီး သံသယ ရှိသူရဲ့အကြောင်းရင်းကို အသေးစိတ်စုံစမ်းနေတယ်လို့ ရီနိုမြို့ စုံစမ်းစစ်ဆေးရေးဌာနက ပြောပါတယ်။သေဆုံးသူ ၃ ယောက်ထဲမှာ အခင်းဖြစ်ပွားတဲ့ ယာဉ်ရပ်နားရာနေရာကို ကားမောင်းလာတဲ့ ယာဉ်မောင်း တစ်ယောက်ပါဝင်ပြီး ကျန်တဲ့နှစ်ယောက်ကတော့ ဘယ်သူတွေဆိုတာ မသိရသေးဘူးလို့ ရီနိုမြို့ စုံစမ်းစစ်ဆေးရေး ဌာနက ပြောကြားထားပါတယ်။
